Kryetari i Levizjes Socialiste për Integrim, Ilir Meta, është shfaqur me një tjetër kostum politik, ndryshe nga çfarë e kemi parë këto katër vjet. Një Metë që i ngjante më shumë atij të vitit 2006 kur kapërcente poltronet në parlament gjatë betejës kur ishte në një front me PD. I prerë dhe i qartë, në studion e televizionit TCH, Ilir Meta i ka lëshuar një mesazh të qartë ish aleatit të tij në qeveri, Sali Berisha. Duke e quajtur atentat atë që iu bë KQZ-së me tre motivacione të ndryshme brenda një seance parlamentare, kreu i LSI paralajmëroi kreun e ekzekutivit…”Tashmë KQZ ka rënë. Berisha le ta marrë të gjithën, ta bëjë edhe 7 me 0, pak na intereson. Por i them një gjë të qartë kryeministrit Berisha dhe mbështetësve të tij. Të mos guxojnë të prekin qoftë edhe një votë të opozitës, pasi ndryshe do të përgjigjen një më një…”
Gazetari: Është hera e parë që vini në këtë studio si opozitar. Çfarë ndjesie është kjo për ju? Nuk është një ndjesi e re, por ama duhet të ketë një nuancë tjetër kësaj radhe…
Meta: Në politikë kam lindur si opozitar edhe LSI është ngritur si një parti opozitare.
Në fakt më kujtohet kur keni qenë në këtë studio në prill të viti të kaluar, pra është e habitshme se sa shumë gjëra ndryshojnë brenda një vitit, nga pranvera në pranverë…
Shumë më tepër ndryshime do të ketë në tre muajt e ardhshëm.
Megjithatë, z. Meta këto ndryshime që ju dhe partneri juaj kryesor politik tashmë z. Rama reklamoni janë vënë në dyshim nga ajo që po ndodh me KQZ-në. Në fakt, argumenti i dytë i mazhorancës, përveç atij të parit politik, ishte dhe një argument që bazohet te kodi dhe te fakti se z. Ilirian Muho kishte gënjyer për CV-në e tij. A e konsideroni ju një gafë të z. Muho dhe LSI-së për të propozuar një kandidat që kishte një cen të tillë, ku së paku mazhoranca arriti të kapej dhe të ketë një argument teknik për shkarkimin e tij?
Lidhur me pretendimet e pseudomazhorancës aktuale, sepse nuk do të isha i sinqertë nëse do të quaja mazhorancë, duhet të them se e gjithë sjellja e tyre e reflekton në mënyrë të qartë se kanë humbur logjikën, kanë humbur kontrollin mbi arsyen dhe çdo lloj përgjegjësie përpara vendit, duke e ndjerë pikërisht atë që nuk e pengojnë dot atë ndryshim që do të ndodhë në 2-3 muajt e ardhshëm. Atë rotacion të domosdoshëm, të pashmangshëm dhe të sigurt. Ajo që ndodhi me dhunimin e pavarësisë së KQZ-së ka të bëjë me prishjen e standardit të zgjedhjeve në mënyrë antiligjore, në mënyrë antikushtetuese dhe të mënyrë të njëanshme. Nuk ka për të ndikuar në rezultatin e zgjedhjeve. Natyrisht do të ketë një ndikim, por ai ndikim do të jetë pozitiv në drejtim të një angazhimi shumë më të madh të të gjithë opozitës së bashkuar dhe qytetarëve që nuk mund të pranojnë atë arrogancë të jashtëzakonshme që kanë parë atë ditë në parlament apo që mund ta kenë parë edhe sot gjatë zhvillimeve të seancës plenare deri në përçudnim të institucioneve që duhet të punojnë në bazë të ligjit dhe në bazë të procedurave demokratike. Për rastin konkret është një gënjeshtër e madhe preteksti se ky person kishte një problem ligjor.
Absolutisht, ishte një mashtrim i hapur ajo që ka ndodhur e cila erdhi si reagim pas panikut të një kundërshtimi të gjerë dhe të ashpër për iniciativën e politizimit ekstrem të KQZ-së përmes gjoja arsyetimit se KQZ-ja është politike dhe anëtarët janë përfaqësues partish. Gjë që bie në kundërshtim me përcaktimin e Kushtetutës dhe të vetë kodit të miratuar me konsensus. Në rastin konkret, kemi të bëjmë me një masë administrative të marrë ndaj zotërisë në fjalë në kohën kur ka qenë prokuror i rrethit të Fierit, jo për një përgjegjësi të tij të drejtpërdrejtë, por për një vlerësim në atë kohë të një akti disiplinor që ky duhet të kishte marrë ndaj një prokurori të një çështje të caktuar. Dhe më pas ky prokuror, i cili gjithashtu është shkarkuar, e ka fituar në Gjykatën e Lartë të drejtën e tij. Edhe në rast se ekzistonte kjo, sepse këtu nuk ka asnjë fshehje, ka qenë një dekret publik madje, është botuar edhe ditën që është diskutuar emri në komisionet parlamentare në mediat opozitare, pra në media si të thuash më pranë PS-së. Nuk ishte diçka e panjohur. Nuk është se ky person është pyetur për rastin në fjalë, sepse po të ishte pyetur do të kishte dhënë sqarimet përkatëse. Në rastin në fjalë për të kuptuar standardin e vërtetë moral të kësaj pseudomazhorance, unë mund të t’iu them se kryetari i mëparshëm i KQZ-së, që unë nuk dua t’ia përmend emrin edhe pse ai njihet mirë nga të gjithë, por nuk do të doja të hyja në këtë gjë pasi kam parë se ai me shumë pasion ka dalë këto ditë për të bindur njerëzit se KQZ duhet të jetë vetëm politike, i propozuar nga kjo mazhorancë që ka drejtuar dy palë zgjedhje ka qenë i arrestuar nga ish-presidenti Sali Berisha, ka qenë i dënuar në atë kohë nga qeveria e z. Berisha dhe ka qenë i shkarkuar. Megjithatë askush nuk e ka më të drejtën sepse edhe për ata që shkarkohen ekziston rehabilitimi pas një kohe të caktuar. Kështu që nuk ekziston asnjë pretendim i tillë. Kjo tregoi dhe provoi qartë atë shqetësim që ne bëmë publik apo motivimin kryesor të përfundimit të kësaj marrëveshjeje me PD-në përveç kohës fizike. Tregoi edhe bindjen se PD po kalonte në një arrogancë të papërmbajtur në cenimin e institucioneve. Përmes një qendre të vetme politike synonte dhe po synon të kontrollojë të gjithë jetën politike, institucionale, mediatike dhe çdo gjë tjetër. Ky përbën një shqetësim të madh për demokracinë, për standardet evropiane që duhet të ketë shoqëria jonë. Jemi në këtë moment që standardi i zgjedhjeve është
dhunuar por absolutisht që kjo nuk do ta pengojë ndryshimin, rotacionin, sepse jam i bindur se opozita është jashtëzakonisht e motivuar dhe i ka të gjitha mundësitë dhe instrumentet për të arritur një fitore peblishitare dhe për ta mbrojtur atë në mënyrë të jashtëzakonshme.
Çfarë do të ndodhë tani me KQZ-në? Do të propozojë LSI emra të rinj?
LSI nuk mund të bëhet pjesë e legjitimimit të një farse. Nuk kemi më KQZ. Ai nuk është më siç e parashikon Kushtetuta dhe Kodi, një institucion i pavarur. Nuk është dhunuar thjesht një person. Është dhunuar institucioni dhe ky ka qenë edhe shkaku i reagimit individual të anëtarëve të tjerë të KQZ-së. Përpjekja për të kontrolluar në mënyrë të paligjshme dhe të dhunshme KQZ-në nuk mund të legjitimohet jo nga LSI-ja por edhe nga e gjithë opozita.
Çfarë mund të bëjë opozita? Po shikojmë që po braktisni çdo gjë.
Opozita nuk braktis asgjë, veçanërisht betejën për zgjedhje të lira. Ajo do të shumëfishojë forcat dhe energjitë e saj. Opozita nuk kërkon shtyrjen e zgjedhjeve por afrimin e tyre nëse ka mundësi. 23 qershori u duket të gjithëve shumë larg. Opozita i ka të gjitha kapacitetet dhe instrumentet për të garantuar edhe një votë të vetme në të gjithë territorin. Ajo që po ndodh është që sot të gjithë prozhektorët brenda dhe jashtë vendit janë të përqendruar tek Sali Berisha, njeriu që po shkatërron zgjedhjet, njeriu që kujton se vetëm duke pasur kontroll absolut mbi çdo institucion do të arrijë të imponojë shumica që nuk ekzistojnë. Të gjitha zgjedhjet historikisht kanë treguar qartë që PD është pakicë dhe e majta shumicë pavarësisht nga historitë, problematikat e saj në vitin 2005 apo në vitin 2009. Pra nëse ai do ta mbajë KQZ-në kështu siç do nuk ka asnjë problem. Le të shtojë edhe tre të tjerë, ta bëjë 7 me 0. Meqenëse kishte nostalgji për këtë lloj KQZ-je, siç ka qenë deri në vitin 96-97, por kjo nuk është kjo kohë. Opozita sot është në një stad tjetër dhe është tepër e bindur që do të garantojë një rotacion të pashmangshëm dhe të sigurt. Unë mendoj se jemi ende herët për të komunikuar më shumë detaje. Por për një gjë të jeni të bindur, opozita nuk ka asnjë qëllim që të bojkotojë zgjedhjet, apo të shesë zgjedhjet, përkundrazi.
Opozita do të jetë në gjendje të mbrojë votat e të qytetarëve shqiptare. Mjerë ai që do të prekë edhe një votë të vetme!
Kur thoni kështu, keni parasysh kryeministrin Berisha?
Unë kam parasysh cilindo që mendon se mund të vërë dorë mbi një fletë të vetme votimi. Kaq kam parasysh, asgjë tjetër.
Me çfarë do të përballet?
Do të përballet me ligjin dhe me të gjithë qytetarët. Unë mendoj se këto ata që kanë kurajë për ti provuar, le të provojnë. Nuk ka asnjë problem. Ne kemi të drejtë të kërkojmë zbatimin e ligjit, kemi të drejtë të kërkojmë respektimin e standardeve të cilin e shohim me vend. Kemi qenë shumë konstruktivë, do vazhdojmë të jemi të tillë, por absolutisht ta heq nga mendja Berisha, lidershipi ekstrem i Partisë Demokratike, nuk po flas për njerëz të arsyeshëm, por për ata të cilët votojnë, nuk e besojnë, etj, duhet ta dinë shumë mirë se me dhunë nuk mbahet pushteti. Edhe një votë e vetme po të preket, përgjegjësinë do ta kenë të drejtpërdrejtë, kjo duhet të jetë e qartë. Shqipëria nuk mund të kthehet në vitin 96-97. Shqipëria është një vend anëtar i NATO-s, dhe Shqiptarët e kanë vendosur që do të ecin përpara në mënyrë të vendosur në rrugën e ndryshimit.
Po thoni që protesta popullore është një opsion i opozitës për të mbrojtur votën e lirë?
Kjo është histori që ka përfunduar. Tani Berisha duhet të gjejë mënyrën si të dalë nga kjo situatë, do të dalë me dinjitet, me përgjegjshmëri, me reflektim. Ai rezultatin e humbjes së tij nuk e ndryshon dot, të jeni të sigurt. Le të paguajë qeveria aktuale miliona dollarë për “PODESTA Group”, që arriti sot të falsifikojë dhe të manipulojë këtë institucion ndërkombëtar, edhe media ndërkombëtare erdhën në deklaratën e drejtorit të Departamentit të Shtetit, dhe gjithë këto fonde merren nga taksapaguesit shqiptarë, jo thjeshtë nga ata që kontribuojnë për Partinë Demokratike, dhe gjithçka tjetër. Ndryshimi do të ndodhë në mënyrën më absolute. Në qoftë se Berisha reflekton, do ti bëjë një të mirë vendit, por edhe vetës së tij, sepse përndryshe do të lërë si trashëgimi prishjen e zgjedhjeve, përpjekjen për manipulime dhe sjellje të papërmbajtura që nuk
i takojnë edhe për eksperiencën që ka, nuk i takojnë të tilla sjellje një kryeministri të një vendi që është anëtar i NATO-s.
Dukeni shumë i nxehur me këtë situatë…..
Jo absolutisht, nuk jam aspak i nxehur, jam shumë i qetë, por më vjen keq që ne të konsiderohemi një regjim hibrid si Tunizia siç e cilësonte “The Economist’. E përse? Për këto gjëra. Këto janë gjëra fare normale, janë gjëra të palogjikshme, për ta pasur një marrëveshje me Partinë Socialiste, kërko bisedime me partinë Socialiste, apo jo? E ke bërë kodin me ekspertë të OSBE\ ODIHR, kërkoi edhe ata që ta interpretojnë këtë gjë. Si mund të paraqesësh tre motivacione të ndryshme në një seancë parlamentare për të shkarkuar një njeri? Në cilin parlament të botës mund të ndodhin këto gjëra? Në parlament të botës ndodhin, por në çfarë vendi të zhvilluar Europian mund të ndodhin? Ne nuk e meritojmë të kthemi këtu sepse kjo ndodh për arsye të një tensioni, të një pasigurie dhe të një paniku për zgjedhjet. Si mund ti manipulojë opozita zgjedhjet? Kjo është një çështje e padëgjuar ndonjëherë. Meqenëse do ti manipulojë opozita zgjedhjet, atëherë do ta merrnim ne këtë garanci, duke shkelur ligjin, duke shkelur kodin, duke u sjellë në mënyrë të dhunshme, që do të garantonim zgjedhjet.
Jeni të hapur për negociata për një riformatim të KQZ-së?
Patjetër. Absolutisht. Në bazë të ligjit, në bazë të konsensusit, absolutisht që po, patjetër.
Ka edhe një sens politik, lidhur me faktin që LSI-ja kaloi në opozitë i ndryshon raportet në KQZ, tek KZAZ-të, e deri tek ato të numërimit. Ky ka qenë edhe argumenti kryesor politik. Si e gjykoni këtë argument ?
Ky s’është argument. Ky është spekulim. Argumenti është ligji. KQZ-ja është një institucion kushtetues i pavarur, jo i balancuar. Mandati i anëtarëve është 6 vjet, nuk është 4 vjet dhe tjetra që është e rëndësishme, institucionet e tjera KZAZ-të dhe komisionet e qendrat e votimi e me radhë të gjitha këto janë të përkohshme, janë për një palë zgjedhje. Pra, janë ad-hoc, për 23 qershorin. Natyrisht që tek këto të tjerat që këtu partitë kanë një rol kryesor dhe përfaqësuesit aty janë direkt të partive dhe absolutisht që çdo gjë do të bëhej në frymën e Kodit për të gjitha
strukturat e tjera. Por, kjo përmendej qëllimisht për të manipuluar opinionin që këtu po bëhet nami dhe që opozita do të manipulojë zgjedhjet. I vetmi vend në botë ku kryeministri thotë se opozita do të manipulojë zgjedhjet. Kjo është çudi e paparë.
Z. Meta, pra ka një negociatë për momentin qoftë edhe indirekte me mazhorancën për të gjetur zgjidhje për këtë situatë?
Unë nuk kam qenë i angazhuar në ndonjë negociatë. E theksoj Kodin e ka bërë Partia Demokratike me Partinë Socialiste. Ne kemi pasur kundërshtimet tona. E kanë bërë me konsulencën e OSBE-ODIHR-it. Duam t’i rikthejmë legjitetimitetin KQZ-së. Ti diskutojmë këto çështje, absolutisht. Duam t’i fillojmë zgjedhjet me standardin zero, sepse këtu fillon standardi zero. Kjo është një përgjegjësi e Sali Berishës nga sot dhe deri ditën që do të përfundojmë zgjedhjet, opozita do të garantojë mbrojtjen e votës së qytetarëve shqiptarë. Absolutisht që zgjedhjet të bëhen në 23 qershor dhe po të ketë mundësi të shpejtohen dhe është e sigurt në fitoren e saj të pashmangshme.
Ju e takuat z. Berisha, u duk sikur u ndatë në mënyrë paqësore?
Raportet tona gjatë këtyre katër viteve, nga momenti që u iu përgjigja pozitivisht ftesës për bashkëqeverisje. Kanë qenë konstruktive mendoj dhe kanë qenë bashkëpunuese. Kemi ndarë mendime të ndryshme për çështje të ndryshme të cilat në raste të caktuara janë shprehur edhe publikisht në raste të tjera nuk ka qenë e nevojshme dhe e domosdoshme, por janë shprehur ballë për ballë. Ddhe në takimin e fundit që ne kemi zhvilluar më datën 1 prill, unë e kam falënderuar për bashkëpunimin që kemi pasur dhe njëherësh i kam bërë të qartë që kisha vendosur të bëja një zgjedhje tjetër për ato arsye që pak a shumë janë bërë të njohura.
Ia thatë hapur që do të bëni koalicion me PS-në dhe si e priti këtë?
Po, po patjetër. Po të më kishte thënë në këtë takim që anëtari që ju keni propozuar prish balancat, të jeni të sigurt që unë besoj se kjo çështje mund të ishte zgjidhur, me zotin Muho pa qenë e nevojshme për të krijuar trauma të tilla.
Pra, do ta kishit tërhequr zotin Muho në rast se do tua kishte kërkuar z. Berisha ?
Unë besoj se po, sepse për mua nuk ka qenë e rëndësishme ishte 4 me apo 3 me 4. Nuk ka qenë pjesë e ndonjë marrëveshje me Ramën se do të kontrollohen KQZ-ja dhe KQV-të. Për më tepër që numërimi është shumë qartazi që realizohet 2 me 2, pra dy nga maxhoranca dhe dy nga opozita. Gjithçka tjetër mendoj se ka qenë një ekzagjerim për të justifikuar me propagandë bolshevike një veprim të dhunshëm bolshevik.
Megjithatë duket sikur ishte një divorc në paqe, në buzëqeshje. Ju deklaruat se në pushtetin lokal qytetarët do të ishin të parët. Fill pasi LSI votoi në Këshill Bashkiak një projekt tepër të rëndësishëm për kryeqytetin, një ditë më pas erdhi fillimi i procedurave për shkarkimin e Ilirjan Muhos. A ishte kjo pak prerje në besë, z. Meta?
Duhet të kemi parasysh disa gjëra sepse unë nuk kam për zakon që të tregoj histori se çfarë i kam thënë unë z. Berisha dhe se çfarë më ka thënë mua ai, ashtu sikurse këtë nuk e kam bërë as me Nanon e as me të tjerë sepse këto janë gjëra që thuhen dhe nuk i interesojnë shumë opinionit publik. Kam dëgjuar shpesh ku thuhet se po bëhet një komplot i madh për të rrëzuar qeverinë e Berishës. Ajo që i kam thënë është që, unë do të marr këtë vendim, për arsyet që janë dhe tjera ka qenë se, unë dhe deputetët e mi nuk votojmë kundër qeverisë tënde, sepse nuk ka moral tani që ne sot jemi në qeveri dhe pas një jave të themi se qeveria u bë e keqe, u bë e zezë dhe le ta rrëzojmë atë. Për më tepër që, pavarësisht se ata nuk i kishin 71 vota të plota për maxhorancë, por sipas zgjedhjeve të vitit 2009, përsëri Partia Demokratike ishte partia e parë, pra koalicioni i saj. Dhe natyrisht që nuk ka qenë asnjëherë pjesë e diskutimeve apo e angazhimeve të mia me Ramën apo edhe me partnerët e tjerë ndërkombëtarë, të cilët janë shprehur hapur në mbështetje të këtij koalicioni, një angazhim i tillë për të ndryshuar qeverinë, për të bërë një qeveri teknike. Sepse unë e kam shprehur qartë edhe në konferencë për shtyp se interesi i vendit, i të gjithëve, është që ndryshimi të ndodhë përmes votës së qytetarëve, pra jo thjesht me makinacione në Parlament. Pra, kjo ka qenë një betejë e shpikur e z. Berisha dhe unë kam qenë shumë i qartë për këtë gjë. Edhe çështja e KQZ-së mund të ishte zgjidhur me një bisedë normale, nëse do të kishte qenë ky shqetësimi real. Por nuk ka qenë ky shqetësimi real. Shqetësimi real është diferenca e
madhe që ekziston tashmë midis koalicionit të së majtës së bashkuar, e besimi për ardhjen e saj në pushtet pas tetë vitesh dhe gjendjes elektorale të Partisë Demokratike. Dhe kjo mënyrë e dhunshme duhej bërë për të krijuar të kundërtën e kësaj bindjeje që ata kanë vetë tek njerëzit që i mbështesin, sipas tyre, duke u thënë se, shiko mos u shqetësoni, se ne morëm me forcë këtë, morëm me forcë atë etj, në mënyrë që të kompleksojmë, sipas tyre, sa më shumë të jetë e mundur elektoratin dhe të shpikim beteja të paqena. Dhe kjo është një e drejtë e tyre, por dëmi që i bëjnë vendit është i jashtëzakonshëm sepse shkatërrojnë jo vetëm një institucion kushtetues por shkatërrojnë një institucion shumë të rëndësishëm për zgjedhjet dhe tani për Shqipërinë dhe shqiptarët, për të ardhmen e tyre jo thjesht për katër vitet por ndoshta edhe më shumë, kam parasysh këtu ecurinë e procesit të integrimit evropian, çështja më kruciale, e theksuam nga të gjithë, është dhe do të jetë çështja e zgjedhjeve. Fitorja e opozitës absolutisht do të jetë bindëse por në rast se KQZ-ja qëndron kështu sic është, absolutisht që ajo është një njollë e madhe dhe një turp i madh për vendin tonë për gjithçka që vjen pas zgjedhjeve.
Nuk na e shpjeguat faktin se pse nisi shkarkimi i z. Muho menjëherë pas votimit tuaj të fundit në Këshillin Bashkiak?
Nuk dëshiroj t’i lidh këto çështje. Ne kemi qenë plotësisht të sinqertë në angazhimin tonë për të mos i politizuar institucionet dhe qeverisjen vendore. Siç e përmendët dhe ju një ditë përpara këshilltarët tanë votuan në bashkinë e Tiranës në përputhje me rendin e ditës të propozuar nga kryetari i bashkisë. A është rastësisë apo ku di unë, nuk dua të hyj në këto gjera, por dua të kemi parasysh që gjërat kanë ndryshuar shumë pas këtij atentati që i bëhet KQZ-së dhe zgjedhjeve të lira. Në këtë drejtim absolutisht që reagimi ynë vjen si një domosdoshmëri e një ndikimi akoma e më të madh të gjithë aksionit opozitar, në kushtet kur qytetarëve u rrezikohet vota, u rrezikohet e ardhmja e tyre. Për ne, prapë qytetarët do të jenë të parët, nuk ka asnjë shqetësim do të rritet dhe do të forcohet llogaridhënia, transparenca, por abolsutishty që askush nuk mund të angazhohet kundër qytetarëve pavarësisht nga manipulimet e medieve të kapura dhe të kontrolluara.
Nuk mund të thuhet që nuk ka patur një raport special mes jush dhe z. Basha?
Raportin me special unë e kam pasur me z. Berisha. Absolutisht. Dhe marrëveshjen e kam pasur me të. Nuk kam pasur marrëveshje me asnjë tjetër. Natyrisht, me z. Basha unë kam pasur një komunikim shumë të mirë, jo gjatë këtyre katër viteve, përpara se ai të angazhohej në politikë, gjatë periudhës që ai ishte angazhuar dhe në vazhdimësi por nuk kam pasur asnjë marrëveshje me të, marrëveshja ime ka qenë me z. Berisha si kryetar i PD dhe me PD, marrëdhëniet me të i kam pasur shumë të mira siç i kam me z.Patozi, e më gjerë.
Një natë përpara se të takonit Berishën, keni qenë për orë të tëra me z. Basha?
Kjo nuk është e rëndësishme aspak. Unë kam qenë dhe jam i hapur për tu takuar me të gjithë. Nuk ka ndonjë lidhje kjo.
Më bëri shumë përshtypje fakti që thatë që nuk do kishte moral për LSI ti kundërvihej një qeverie ku ajo bënte pjesë? LSI këtë vit do bëj fushatë kundër Berishës apo kundër qeverisë së Berishës?
LSI e ka bërë të qartë se do të bëjë një fushatë për të vendosur një ekuilibër të ri në politikë në vend, për të bërë një ndryshim të domosdoshëm i cili sjell një ndarje të re të pushteteve dhe njëkohësisht i cili çel një perspektivë të re evropiane për vendin. Sepse problemi kryesor gjatë këtyre viteve ka qenë një ngërç i marrëdhënies midis mazhorancës dhe opozitës. Ngërçi ka ardhur duke u thelluar për arsye sepse mazhoranca ndërkohë morri gjatë kësaj kohe disa isntitucione të tjera të përfshira, të presidentit të republikës.
Dhe me votat tuaja?
Patjetër. Prandaj dhe ne do të vendosim një balancë përmes këtij akti. Dhe duek qenë se opozita është shumë e përjashtuar nga jeta institucionale, duke qenë se procesi i integrimit përjetoi nj stanjacion të pa merituar, duke qenë se siç e shohim dhe tani lidershipi i PD nuk ka treguar vetëpërmbajtjen e duhur për të vendosur ato ura komunikimi, të sjellë realizimin e disa objektivave të përbashkëta që janë për vendin, përfshirë dhe çështjen e famshme të tre ligjeve, e
vetmja mënyrë që shqiptarët të ndihen më të bashkuar dhe politika të hyj në nj rrugë të vërtetë të bashkëpunimit objektiv, është pikërisht ajo të kemi njw parlament të ri, një mazhorancë të re, një kryeministër dhe një qeveri të re.
Dhe një president të ri?
Jo nuk jemi për ndërprerje të mandatit të presidentit siç bëjnë këta me KQZ, natyrisht që opozita e nesërme do të jetë ajo e përfshirë ne jetën politike dhe institucionale të vendit, dhe përmes presidentit aktual dhe përmes përfaqësimit të saj në shumë institucione të tjera.
Çfarë e pengon sot integrimin e Shqipërisë në BE, zgjedhje të lira dhe të ndershme dhe prishja e KQZ, apo tre ligjet?
Sot, prishja e KQZ është e para sepse zgjedhjet kanë qenë dhe mbeten problemi më i rëndësishëm. Natyrisht çështja e tre ligjeve ëhstë shumë e rëndësishme dhe e paevitueshme. E para është konsideruar si minimumi i domosdoshëm dhe jo si çdo gjë që duhet bërë dhe në këtë drejtim unë do dëshiroja shumë që të gjendet një zgjidhje e përgjegjshme për çështjen e KQZ dhe procesin e zgjedhjeve të lira. Beteja nuk është në KQZ. Ndërsa përsa i takon çështjeve të tre ligjeve unë shpresoj dhe besoj që mund të ketë iniciativa pozitive por nuk dua të flas përpara kohe.
Pra, pritet që së shpejti opozita tashmë e bashkuar ti votojë këto tre ligje?
Ne jemi në hartimin e një marrëveshje me PS, ku kuptohet objektiv kryesor është përshpejtimi i integrimit evropian të vendit dhe angazhimi për të çuar përpara dhe tre ligjet besoj do të jetë një angazhim i përbashkët dhe jo thjesht opozitar.
Për këtë legjislaturë?
Përpjekja bëhet gjithmonë për këtë legjislaturë sepse në rast se nuk do të bëhet për këtë legjislaturë Shqipëria rrezikon të mos e marrë statusin e vendin kandidatë as në muajin dhjetor.
Do të zgjidhet situata në Qarkun e Fierit?
Pse jo, ka qenë një ngërç i pamerituar edhe për qytetarët e Fierit, pasi tashmë mund të konsiderohet i zgjidhur, por edhe kudo tjetër në të gjitha qarqet e tjera ku të gjitha këshillat e bashkive dhe komunave do të rikonfigurohen bashkimet e reja të opozitës në nivel vendor, ku do
të dimensionojmë më tej forcën e aksionit dhe reagimit angazhimit opozitar dh qytetar në nivel lokal.
Në fakt, do të doja t’iu pyesja pak edhe për reflektimin tuaj në këto katër vite qeverisje me PD-në. Është pak vështirë për të folur për një reflektim pozitiv pasi tonet dhe retorikat
janë ashpërsuar shumë. Madje, unë e kam pasur edhe në reklamën e këtij emisioni thënien e famshme të kryeministrit që “opozitës do t’i lëmë ngjalat e Nar Kokës ndërkohë që ne do të ecim përpara dhe do të fitojmë”…
E kam dëgjuare dhe unë shpesh këtë thënie dhe këtë betejë të doktorit me Nar kokën. Në kushtet kur ai po i shmanget një debati me z. Rama, shpresoj të ketë me dëshirë një debat me Nar Kokën.
Gjithsesi vetëm në rast se z. Koka pranon…
Te jesh i bindur që ai do ta pranojë.
Megjithatë, realisht si ishte bashkëjetesa me Kryeministrit Berisha, pasi me Sali Berishën vetë keni pasur një histori jo të pakët fërkimesh?
Unë mendoj se ka qenë shumë më e mirë se ç’është menduar në fillim. Absolutisht që ne jemi nisur me qëllime shumë të mirë në këtë marrëveshje dhe natyrisht nuk e kemi menduar se ky do të ishte një bashkëpunim që do të shkonte me aq, sepse ka qenë një koalicion i panatyrshëm dhe i paparashikuar, por i imponuar nga rezultati i zgjedhjeve dhe nga ndarja e ashpër mes PS-së dhe LSI-së për shkak të refuzimit të PS-së për të bërë koalicion me LSI-në para zgjedhjeve. Unë përsëri e vlerësoj këtë bashkëpunim, arriti disa rezultate të rëndësishme, në një situatë politike jo shumë komode ku në veçanti duhet të përmend aksionin 1-vjeçar për liberalizimin e vizave, por edhe shumë momente të tjera mund të përmendja. Absolutisht që nuk jemi aspak të penduar për këtë marrëveshje, përkundrazi nuk kemi asnjë pakënaqësi përgjatë këtyre 4 viteve pavarësisht të gjitha dallimeve, diferencave dhe debateve të ndryshme që mund të jenë krijuar. Sigurisht që besoj se duhet të ishte e pritshme për të gjithë ata që arsyetojnë politikisht se kjo nuk mund të ishte një marrëveshje afatgjatë dhe unë i kisha vënë vetes si qëllim kur hyrë në këtë marrëveshje se do të bëja çdo gjë për ta respektuar atë, sepse kishte dhe ka pasur vështirësitë e saj, interesa të ndryshme në momente të ndryshme. Dhe mendoj që e arritëm me sukses. Sjellim një përvojë të re në jetën politike, por mbetet kjo përvojë pavarësisht se janë dy forca politike të dy kaheve të ndryshme. Është një emancipim mendoj unë për shoqërinë tonë për politikën tonë dhe pavarësisht nga situata në të cilën ndodhemi sot nuk jemi aspak të mërzitur. Veçse kuptohet që sapo lëvizi LSI nga qeveria mazhoranca aktuale apo le të themi qeveria e humbi kontrollin dhe maturinë që do të duhej të tregonte dhe në rastin konkret të KQZ apo në çështje të ndryshme.
Berisha është një burrë shteti apo një diktator?
Mendoj se është në një provë të madhe tani për t’iu afruar njërës apo tjetër dhe kjo do të duket në raport me zgjedhjet. Ai është i pafuqishëm për të ndikuar në rezultatin e zgjedhjeve. E theksoj këtë, edhe ai vetë e di shumë mirë. Edhe ai vetë e di shumë mirë këtë gjë. Por ka shumë rëndësi që qëndrimi i tij në rast se ai do të donte të mbetej apo t’i afrohej vlerësimit të parë dhe jo të dytit. Të shikojë interesat e vendi, interesat afatgjata. Nuk është e rëndësishme nëse PD merr 58 apo 62 mandate. Nuk është kjo që do të mbahet mend pas 23 qershorit. Ajo që do të mbahet mend është nëse zgjedhjet në Shqipëri ishin të lira dhe të ndershme apo zgjedhjet në Shqipëri edhe pse fitoi opozita nuk i kishin standardet e duhura për shkak të sjelljes të pakontrolluar dhe të papërmbajtur të mazhorancës, e cila natyrisht ka një emër.
Megjithatë ju keni vetuar pro të gjitha vendimeve të mazhorancës…
Jo të gjitha. Për ato çështje që kemi rënë dakord. Për çështje të tjera ne kemi mbajtur qëndrime të ndryshme. Çështje që kanë pasur të bëjën me Gjykatën Kushtetuese apo Gjykatën e Lartë. Një
çështje e rëndësishme e cila mund të sillte një krizë të koalicionit ka qenë ligji për SHISH-in. Dallimi ka qenë ekstrem dhe ku falë qëndrimit të prerë të LSI-së dhe timit në Parlament ai ligj nuk u votua. Nuk u votua sepse rrezikonte marrëdhëniet tona me NATO-n në atë kohë. Tek çështja e Presidentit ne kemi qenë tepër të hapur dhe kemi punuar shumë për një zgjidhje konsensuale. PD ka pasur objektivin që Presidenti të ishte i saji edhe pse në marrëveshjen tonë ishte i qartë angazhimi që Presidenti të zgjidhej me konsensus. Edhe ky ka qenë një moment kur qëndrimet tona kanë qenë të ndryshme pavarësisht se në fund për shumë arsye edhe të personave u bë ajo zgjidhje, që nuk ishte më e mira si zgjidhja politike por e cila njëkohësisht e bën të domosdoshëm këtë rebalancim politik në vend pas 23 qershorit.
Çfarë raportesh keni me Presidentin Nishani?
Marrëdhëniet e mia kanë qenë tepër korrekte në aspektin personal, shoqëror edhe politik. Ka qenë një nga emrat më të pranueshëm të PD-së për shkak të korrektesës personale por mendoj se i duhet shumë punë për të qenë presidenti i të gjithë shqiptarëve. Unë besoj se pas 23 qershorit do t’i ketë të gjitha mundësitë që të vihet në këtë nivel. Është njeri i arsyeshëm.
Duhet të kishte folur për rastin e KQZ-së?
Unë mendoj se duhet të kishte qenë më bashkëpunues me opozitën pavarësisht se opozita nuk e votoi. Ky ka qenë edhe mesazhi i parë që unë i kam dhënë kur e kam takuar që më ka falënderuar për mbështetjen tonë. Së dyti mendoj se ka pasur mundësi për të qenë më publik, për të adresuar mesazhe bashkëpunimi midis dy palëve. Mund të merrte edhe iniciativa sidomos në drejtim të procesit të integrimit evropian. Megjithatë besoj se pas 23 qershorit do të kemi një bashkëpunim objektiv dhe të natyrshëm midis presidentit, parlamentit, mazhorancës dhe qeverisë së re.
Nuk duhet të ndihet i kërcënuar nga një mazhorancë e ardhshme?
Do të ndihet i respektuar dhe i mirëpritur për të bashkëpunuar për të mirën e forcimit të institucioneve të vendit por edhe për ti dhënë një mesazh gjithë shqiptarëve, pavarësisht preferencave partiake, që shteti është i të gjithëve megjithatë edhe bashkëpunimi është i domosdoshëm sepse nuk mund të vazhdojmë edhe pas 23 vitesh me debate, me konflikte apo fyerje ashtu sikurse kemi parë edhe sot në Parlament.
A ndiheni i penduar për diçka për mandatin bashkëqeverisës me atë që ju e quani sot armikun kryesor të zgjedhjeve?
Absolutisht asnjë gjë. Mendoj se e ardhmja u takon atyre që guxojnë, që janë të prirur për të parë përpara. Për mua këto katër vite kanë qenë një eksperiencë e veçantë, që do të më ndihmojë dhe do të vlejë për të ardhmen. Unë besoj se kryeministri Berisha është një personalitet kompleks, i cili ka mjaft energji, por të cilat mund ti investojë për qëllime shumë të mira. Por ka edhe ai ato cilësitë e veta të cilat mund të menaxhohen vetëm me këshilltarët. Kështu që në këtë drejtim mendoj se nuk ka politikan perfekt, por në fund të fundit, secili e zgjedh vetë rrugën më të mirë
për veten e tij, por në çdo rast, këtë rrugë kurrsesi nuk mundet të jetë ajo që e lë në histori kur bie në kundërshtim me interesin e vendit.
Nëse ju do të më nënvizonit tre arsye se pse Partia Demokratike dhe maxhoranca e saj duhet të kalojë në opozitë, përveç çështjes së balancimit të pushteteve?
Sepse unë mendoj se Partia Demokratike dhe lidershipi i saj, gjatë këtyre tetë viteve, i ka ezauruar të gjitha mundësitë që kishte për të bërë diçka të mirë. Nuk mund të them se nuk është bërë gjatë këtyre viteve, por mendoj se ka një ezaurim total në këtë drejtim. Pra, gjithçka do të thotë stanjacjon, do të thotë mospranim i realitetit për një përpjekje për ta zbukuruar atë, do të thotë fjalime pafund dhe të gjitha këto pengojnë për të përmirësuar jetën e përditshme të shqiptarëve. Duhet të mendojmë shumë më tepër sesi të realizojmë një punësim konkret të qytetarëve sot, që të minimizojmë pasojat e kësaj krize ekonomike dhe sociale, sepse është gjëja më e thjeshtë që të bëjmë politika spontane, të cilat krijojnë probleme më të mëdha për vendin. Sot situata ekonomike absolutisht që është shqetësuese, është problematike e ngritur kjo edhe nga partnerët tanë ndërkombëtarë. Dhe nuk shkon tani që ne të themi që kemi rritjen ekonomike 2 për qind dhe Gjermania 1.5 dhe ne jemi më mirë se Gjermania. Nuk shkon kjo gjë sepse Shqipëria është një vend në zhvillim. Është vend me potenciale të pashfrytëzuara, është një vend me probleme shumë të mëdha ekonomike dhe të varfërisë. Ekziston edhe si bindje nuk është se është thjesht një përpjekje për të manipuluar opinionin publik. Ne e kemi diskutuara disa herë edhe me kryeministrin Berisha për situatën ekonomike dhe ai ka një bindje që situata është kaq e mirë dhe kaq mbresëlënëse. Kjo nuk lë shpresë për një përmirësim real dhe konkret.
Koalicioni juaj me PS-në duket se ka pasur edhe një reagim pozitiv të një pjese të faktorit ndërkombëtar. A do të thotë kjo që faktori ndërkombëtar po ju jep juve mesazhe që rrotacioni politik është i domosdoshëm në vend?
Faktori ndërkombëtar ka shprehur një shqetësim të thellë për atë që është quajtur ngërçi politik, dhe natyrisht që ideja e një ndryshimi është e mirëpritur dhe absolutisht mendoj që kjo është një gjë e domosdoshme dhe e pashmangshme dhe natyrisht që mendoj që pas 23 qershorit faktori ndërkombëtar do të ketë partnerë më realistë dhe më bashkëpunues.
Nëse pas 23 qershorit, PS-LSI nuk i ka votat për të bërë qeverinë dhe këto vota i ka PD, a do të bëhej pjesë LSI-ja me PD-në për të formuar një qeveri të qëndrueshme ?
Natyrisht që probabiliteti i kësaj ngjarjeje është zero. Por, në respekt të qytetarit më duhet të përgjigjem në mënyrë të qartë dhe pa asnjë ekuivok. Zgjedhja që ka bërë Lëvizja Socialiste për Integrim për të kaluar në opozitë përpara zgjedhjeve dhe për t’u përcaktuar në një koalicion opozitar absolutisht që ka një angazhim të qartë dhe ky koalicion do të vazhdojë edhe pas zgjedhjeve cilido që të jetë rezultati. Rrotacioni është i sigurt. Por, në respekt të qytetarit përgjigja mendoj që është shumë i qartë; LSI-PS është një marrëveshje afatgjatë që vazhdon edhe pas zgjedhjeve pavarësisht nga rezultati i tyre, i cili dihet.
Edi Rama ka deklaruar në këtë studio një javë më parë se LSI nuk i ka prishur kurrë marrëveshjet. Tani që po e rishikoja këtë intervistë, nëse nuk i keni bërë një magji z. Rama, atëherë cili është thelbi strategjisë së ribashkimit tuaj me kreun e PS-së dhe respektivisht të partive që drejtoni?
Një nga ndarjet themelore midis PS-së dhe LSI-së është ajo që ka të bëjë me ndryshimet kushtetuese në vitin 2008, të cilat reflektuan edhe në ndryshimet në kodin zgjedhor dhe praktikisht u përqendruan shumë pushtete tek kryeministri dhe u dobësuan shumë balanca të cilat ishin të fiksuara në Kushtetutë. PS ka reflektuar për këtë dështim dhe mendoj se tashmë ne pajtohemi në një angazhim të përbashkët për të realizuar jo thjesht një marrëveshje 4-vjeçare për marrjen e pushtetit dhe për ndarjen e tij, sepse nuk mendoj se kjo është më e rëndësishme për qytetarët shqiptarë, por për të realizuar një marrëveshje afatgjatë strategjike e cila duhet të ketë si qëllim final anëtarësimin sa më të shpejtë të Shqipërisë në Bashkimin Evropian përmes stabilizimit të institucioneve, pavarësisë dhe modernizimit të tyre e njëkohësisht përmes politikave ekonomike dhe sociale që sjellin standardet konkrete në mirëqenien e çdo qytetari shqiptar. Kjo do të thotë jo thjesht të marrim pushtetin që një pjesë e shqiptarëve të luftojnë pjesën tjetër. Jo thjesht të marrim mazhorancën në parlament dhe t’i presim fjalën opozitës, përkundrazi do ta respektojmë ta dëgjojmë me shumë vëmendje, me shumë vullnet për bashkëpunim. Jo ta provokojmë, e ta fyejmë, ta acarojmë, sepse deputetët nuk janë thjesht vetvetja. Ata përfaqësojnë popullin shqiptar, mendimet e qytetarëve shqiptarë. Të krijojmë dhe të vendosim një standard të ri të bashkëpunimit mes presidentit dhe parlamentit në krijimin e shumë institucioneve të përbashkëta dhe themelore për shtetin, sidomos ato të drejtësisë dhe institucioneve e pavarura në mënyrë të veçantë. Pra, nuk mund të jetë kurrsesi një marrëveshje pragmatiste dhe punësh.
Megjithatë, vendi ka nevojë të dalë nga tranzicioni. Edhe kjo që ndodhi është një rrëshqitje përsëri në të kaluarën. Nuk është një ndarje përfundimtare me institucionet e dobëta, të pabesueshme dhe të kontestueshme. Do të angazhohemi që kjo gjë të rikuperohet sa më shpejt në ditët dhe në javët e mundshme, por në rast se do të mungojë reflektimi nga pala tjetër atëherë nuk do të jemi ne përgjegjës për problemet në standardin e zgjedhjeve, por pas rezultatit dhe fitores së 23 qershorit do të tregojmë një vizion krejt ndryshe edhe në raport me opozitën e nesërme.
Z. Meta, nëse fitoni zgjedhjet ju vetë do të merrni pjesë personalisht në një kabinet qeveritar?
Nuk kam pasur kohë të mendoj për këtë gjë dhe absolutisht që nuk është gjëja më e rëndësishme për mua as për LSI-në. Përkundrazi, e rëndësishme është për ne që vendi t’i
mbyllë këto plagë të së kaluarës një herë e mirë dhe të ecim në rrugën e një stabiliteti të vërtetë dhe të një modernizimi të pandërprerë të institucioneve dhe të gjithë shoqërisë, përmes bashkëpunimit dhe përmes gjithëpërfshirjes. Politikat e ashpra ndarëse, konfliktuale veçse shtojnë më tej tranzicionin dhe na largojnë mundësinë për të qenë anëtarë të vërtetë të BE-së siç e mendojnë qytetarët shqiptarë, siç e meritojnë vërtet qytetarët shqiptarë.
Le të kthehemi paksa në atë që ndodhi në 21 janar, ku mbetën të vrara katër persona dhe ku në fakt qëndrimet e palëve politike ishin të ndryshme përsa i përket kësaj ngjarjeje. Ajo që do doja t’ju pyesja është se, a ndan z. Meta dhe LSI të njëjtin vizion me Partinë Socialiste për ngjarjet e 21 janarit dhe cili do të jetë qëndrimi juaj në të ardhmen në lidhje me këtë ngjarje?
Kam dëgjuar spekulime të ndryshme në media lidhur me qëndrimet tona për këtë çështje. Qëndrimi ynë është i palëkundur për këtë ngjarje dhe për pasojat fatale të saj për jetën e katër qytetarëve të pafajshëm, i cili është pikërisht ky ku drejtësia duhet të thotë fjalën e saj me forcë, me bindje dhe e pavarur nga politika. Dhe besoj që edhe 23 qershori të ndihmojë që kjo gjë të ndodhë sa më shpejt.
Në një koalicion natyrisht ka edhe një kandidat për kryeministër. Z. Rama dhe PS janë të qartë në këtë pikë. A do të punojë LSI-ja për një qeverisje të mesme dhe të majtë me kryeministër Edi Ramën?
Lëvizja Socialiste për Integrim është e angazhuar për disa objektiva shumë më madhore sesa këto, pra se cili do të jetë emri i kryeministrit nesër. Ne besojmë që në ditët e ardhshme të përfundojmë dhe të finalizojmë këtë marrëveshje me Partinë Socialiste. Më pas kjo është një çështje që i takon qytetarëve shqiptarë. Ne nuk jemi këtu as për të mbështetur patjetër dikë që të bëhet kryeministër, as për të penguar patjetër dikë. Nuk është kjo çështja më e rëndësishme, por më e rëndësishme është gjithë kjo frymë bashkëpunimi e të majtës që ka nisur, e cila duhet të zgjerohet akoma edhe më shumë. E theksoj se qeverisja e nesërme do të jetë shumë më gjithëpërfshirëse sesa mendohet ndoshta sot.
Cili do të jetë roli i LSI-së në një kabinet të nesërm? Pasi ndokush mund të thotë se, se LSI-ja mund të drejtojë të njëjtit sektorë që ka drejtuar edhe gjatë këtyre 3-4 viteve me Partinë Demokratike.
LSI-ja nuk e ka këtë problem dhe këtë shqetësim. Roli i LSI-së do të përcaktohet nga vota që do të marrë LSI-ja, pra nga kontributi që ajo do të japë për sukses të përbashkët. Lidhur me çdo paragjykim, është normale që të ketë edhe paragjykime, që të ketë edhe keqdashje. Këto nuk na shqetësojnë aspak pasi LSI-ja është angazhuar për të ardhmen, për të bërë një transparencë totale të qeverisjes deri tani, përfshirë edhe sektorët ku kanë drejtuar titullarët e LSI-së.
Duket sikur ka një shenjë, një sinjal për një ‘gjueti shtrigash’ ndaj të punësuarve në administratën publike? Keni ndonjë reagim për këtë çështje?
Në momentin që ne kemi vendosur që të kalojmë në opozitë, absolutisht që kemi marrë përsipër të çlirohemi nga të gjitha ato angazhime që kemi pasur nga qeveria për nivele të larta të administratës publike. Besoj se e keni fjalën për ‘fshesën politike’, e cila nuk është hera e parë që ndodh, dhe nuk është se na ka gjetur të papërgatitur apo të shokuar, përkundrazi. Mesazhi im është i qartë që, të gjitha ata që largohen nga puna në mënyrë të padrejtë, do të rifillojnë në 24 qershor. Por nuk është ky problemi ynë kryesor sepse në rast se do të ishte komoditeti i LSI-së, ne mund të vazhdonim në këto pozicione, mund të themi edhe në koalicion me Partinë Demokratike për tëmarrë më shumë mandate, por kjo do të ishte kundër vetë historisë së LSI-së dhe perspektivës së saj politike. Mund të kishim dalë edhe në vete. Por, për ne është e rëndësishme që vendi të mbyllë këtë tranzicion, të mbyllë këtë përpjekje për të përkeqësuar standardet e arritura me aq mund, edhe këtu ku janë apo ku kanë qenë deri para ditësh, të institucioneve të pavarura, të zgjedhjeve e kështu me radhë dhe të çelet një perspektivë e re, dhe që njerëzit të mos jetojnë me atë ankthin që “o do të marr pushtetin, ose po ika nga pushteti do të ndodhë qamet”, ne duhet të jetojmë në një shoqëri normale, demokratike, që nuk vuan nga fryma të tilla përjashtuese dhe armiqësore. Ndërsa përse LSI-ja nuk doli më vete, mund të them që ky ka qenë opsioni më i mundshëm deri përpara një muaji, por bindja se vendi e kishte të domosdoshëm këtë rrotacion, mendoj se e bënte të domosdoshëm edhe pozicionimin e LSI përpara zgjedhjeve në opozitë sepse le të marrim rastin tjetër që Partia Demokratike mund të dilte para Partisë Socialiste, atëherë nuk do të ishte e moralshme, që LSI-ja të bënte koalicion me Partinë Socialiste sepse normalisht që partia që del e para, ka të drejtë të iniciojë formimin e qeverisë dhe do të ishte një mungesë ndaj votuesve, të cilët përsëri do të ndjeheshin disi si të hutuar.
Po thoni që pa LSI-në e majta nuk vjen në pushtet?
Nuk po them këtë gjë. Por, po them që kristalizimi i kësaj bindjeje e bën të domosdoshme pozicionimin e LSI-së në opozitë, duke marrë përsipër të gjitha risqet, të gjitha pasojat e kalimit në opozitë, por me bindjen se ky është shërbimi më i mirë që ne mund t’i bëjmë vendit. Jam i bindur që kështu i bëjmë një shërbim edhe partisë Demokratike dhe ata do ta kuptojnë në të ardhmen këtë gjë. Të gjithë kanë nevojë për reflektim, sepse pushteti të izolon.
Në një shkrim z. Panariti sugjeronte shkruante për lista të përbashkëta PS-LSI, jo në të gjithë vendin, mund të maksimizojnë votat e së majtës. Mendoni që ky është një sugjerim që mund të konkretizohet ?
Nuk e kam lexuar intervistën e plotë të profesor Panaritit, kam dëgjuar shumë lajme që LSI-ja do të marrë 3 apo 4 deputetë tek listat e PS e gjëra të tilla. Ka pasur disa shkrime. Janë normale.
Nuk ka asnjë problem. Ajo që mund t’ju them juve, lidhur me këtë rast është që bindja ime që LSI është një forcë politike e cila nuk kërkon më shumë sesa miraton. Gjithçka e kërkon e bazon tek puna e saj, tek vota, tek mbështetja që ajo gëzon dhe konfirmon, që do të thotë se LSI do të ketë listën e saj dhe absolutisht nuk shikon që listat e përbashkëta do të sjellin maksimizimin e fitores. Çdo forcë politike do të maksimizojë kontributin e saj, vota e saj, mandatet e saj dhe në këtë mënyrë maksimizohen votat dhe mandatet e të gjithë koalicionit.
Ju përjashtoni mundësinë e elementëve të LSI-së në listat e PS-së apo anasjellas?
Është jo normale dhe nuk ka arsye pse. LSI është një forcë politike e cila në bazë të këtij Kodi dhe kësaj zgjedhjeje që ka bërë dhe maksimizon në mënyrë të jashtëzakonshme numrin e mandateve të saj.
Po lista të “zeza” i keni imponuar njëri-tjetrit? P.sh i jeni imponuar z. Rama për mospërfshirjen e Dritan Priftit në listat e PS?
Është për të ardhur keq për shumë reagime të ndryshme, të cilat nuk meritojnë asnjë lloj vëmendje. Unë nuk ndërhyj në çështjet e brendshme të PS-së. As nuk kam të drejtë të vë kushte dhe as nuk pranoj kushte për çështje të brendshme të LSI-së. Janë forumet e LSI-së ato që vendosin. Ne jemi duke realizuar një marrëveshje historike që i jep fund një periudhe të gjatë të ndarjes dhe të konfliktit brenda të majtës. Jam i bindur që do të gjejmë një perspektivë të re afatgjatë edhe strategjike. Kjo që e majta, jo thjesht PS-LSI, të mundet të japë më të mirën e saj për një Shqipëri evropiane, për një Shqipëri shumë më të denjë. Ky qytetarët ndihen të sigurt dhe nuk janë kaq të ndikuar nga politika siç janë sot. Kjo është e papranueshme ndërkohë që qytetarët kanë probleme të tjera dhe kanë nevojë të jenë sa më të qetë në jetën e tyre dhe kjo do të ishte një standard i lartë për vetë jetën dhe mirëqenien e tyre.
A do të tentohet edhe një ribashkim i LSI-së me PS-në?
Nuk mendoj se kjo është një çështje që është në rendin e ditës apo mund të jetë në rendin e ditës. Kryesorja është t’i qëndrojmë fort atyre parimeve dhe atyre objektivave strategjike dhe PS-LSI mendoj se janë mjaft komplementare për njëra-tjetrën.
Mendoni se koalicioni PS-LSI do të jetë mjaft për një fitore të nesërme?
Mendoj se koalicioni duhet të jetë sa më i gjerë, jo thjesht për të garantuar fitoren sepse është e sigurt, por se edhe fryma e bashkëpunimit nuk duhet të jetë thjesht në kornizën PS-LSI por tek të gjitha forcat që duan të kontribuojnë për të ardhmen por edhe tek qytetari i vetëm që nuk e gjen veten në asnjë forcë politike dhe ka individualitetin dhe do që në këtë vend të vendoset normaliteti.
2017 është vit magjik, pasi do kemi zgjedhje të përgjithshme, por edhe zgjedhjen e presidenitt të ri. Zgjedhja e presidentit bie pak më parë në bazë të kalendarit. Do zgjidhni një president të majtë?
Nuk është kjo sfida më e rëndësishme e së majtës. Kryesorja është që e majta duke rivendosur respektin dhe bashkëpunimin brenda vetes, përfshirjen brenda saj do t’i vendosë në gjithë shoqërinë tonë dhe të rrezatojë atë qytetari që e majta ka rrezatuar edhe në të kaluarën, sepse pushteti brutal është bërë i padurueshëm për qytetarët tanë, është i djathtë apo do të jetë i majtë. Duhet një koncept tjetër i politikës ndaj qytetarit.
Vone shume shoku Ilir. Ti dhe Bamir Topi i kane patur ca mundesira per t’ja treguar vendin Saliut.
jo jo, eshte tamam ne kohe. duke ngrene shtohet oreksi, thote nje fjale e urte popullore 🙂
Te ka hije o Ilir kur flet si opozitar. Te ngjit fjala. Vajte hengre 4 vjet m..t me Saliun, na theve zemrat na le ne kurriz malokerine e dhunshme te ketyre qe na kane mbire tani ne cdo centimeter vend e po na marrin frymen me arrogancen e tyre prej katundari. Ehh more Ilir, sa do doja te ishe treguar burre qe ne 2009
Ky ka per te bere namin bashke me Tit Vasilin dhe Haxhinasen. Sa te marrin antarin ne KQZ dhe deputetet ne listat e PS pastaj te shohim se cfare do te bejne.
Qe kur erdhi Meta ne opozite, opozita u be me aktive, ka aksion politik, ka levizje shahisti. Rama do qurravitej edhe pasi ti merrte KQZ-ne ky Sali pordha dhe do nxirrte ndonje gjysmake aty nga selia e PS te thoshte ndonje brockull dhe kaq. Tani ka nerv, ka strategji. Bravo Meta
” I dine Meta punet e veta” tani shef hibridin qe kultivoi per kater vite !
-Nuk e kame thene me pare,sapo lexova intervisten!!!!
Z Moor flet ne emer te Dash dhe jo si ambasadoret qe shpesh flasin kuturu.Ne se Podesta ka manipulue do te kishte reague publikisht DAsh..Mos hani rrena se po te manioulosh Dash reagon dhe sqaron publikisht.Bllokimi i KQZ eshte kthye ne bumerang per Ramen si dhe protesta ndaj Islamit
O Ilirija nga Vicdol-salija… Ik meso njeher shqipen standarte pastaj hajde te komentosh ne forume. Sa te pjerdhur jeni nga trut o njerez. Shkruani nga g-ja e semes per ne qe jetojm ketu. E njihni ju Salijen apo e njohim ne? O Dita pse i botoni keta analfabetet qe jan pakic absolute n Shqiperi??? Shuajini keta dreqer se na kan mbyt atje ke Tema nuk i duam dhe ketu brockullat e paguara te ketyre injoranteve
Po pra keto dtet e fundit jane shtuar shume komentuesit e djathte, duket u kane rritur rrogat….ose ju eshte shtuar paniku
Kta “moderatoret” qe bejn pyetje jan nje skifo me vete. Keta kujtojne se te vetmet pyetje te mira jane ato me gricje thashethemnajash. Njesoj ky Balla, njesoj ai Peka, njesoj ai tjetri i Klanit qe i qurravitet Saliut, te gjith ne nje qyp pjerdhin. T njejtat pyetje medemek “ngacmuse”
Une them ta kishte pyetur: Si i ke nga shpia, mor Ilir djali? Po pleqte te mbahen mire? Nga fshati ndonje haber? Me mbjelljet si shkojne? Po shiu ju demtoi gje te mbjellat? Po kolopuçet si jane me mesime? Ne shkolle publike i ke besoj?
Ja keto pyetje duhet te bejne idiotet qe te mos duken idiote. Pune e madhe se ku ishte dhe nga vjen, si iku dhe si dhe pse erdhi perseri. I perlyer deri ne gryke me m*t dhe me gjakun e shqiptareve. Nuk mund t’ja bejne keto pyetje se eshte jeta e tij private. 😛
Me levizjen qe ka bere Meta kohet e fundit e ka degjeneruar komplet partin e tij,dhe politiken e te majteve…
Hajde njeri i pabese, komunist trashegimtar i PPSH, si ne kohen e luftes kur vrisnit njeri tjetrin pas shpine, si ne socializem kur ja futnit njeri tjetrit me termat Tradhetar, agjent, armik, cdo 5 vjet zbulonit “agjente” e “spiune” ne rradhet tuaja.