Kreu i LSI-së, Ilir Meta, ka udhëtuar sot për në Përmet, ku ka zhvilluar një takim me strukturat e partisë. Meta tha se në zgjedhjet e qershorit, shqiptarët do të vlerësojnë me votë kontribuuesit dhe bllokuesit e integrimit. Sipas Metës, LSI do të fitojë një përfaqësim më të madh në Parlamentin e ardhshëm, duke luajtur një rol akoma më të madh në qeverisje.
“Vota e 23 qershorit për LSI-në është për një Shqipëri që ecën më shpejt. LSI është partia e njerëzve të lirë, që duan të ecin më shpejt në rrugën e integrimit. LSI do të vazhdojë të jetë një forcë e tillë e hapur. LSI është një forcë politike që u ka dhënë dhe u jep mundësi të gjithëve të kontribuojnë, por kurrsesi të shpërdorojnë besimin, të sillen si kapadai, të jenë arrogantë me anëtarët e LSI-së, me qytetarët sepse këto nuk janë në natyrën e Lëvizjes Socialiste për Integrim. LSI është parti e njerëzve me vullnet, me pasion, me kërkesa ndaj vetes për të kontribuar për të ardhmen. Ne mbështetemi në mënyrë të veçantë tek rinia sepse duam që të ecim më shpejt. Ky nuk është thjesht slogani ynë, kjo është sfida jonë. Është sfida e të gjithë qytetarëve shqiptarë”,tha Meta.
Kreu i LSI-së tha se dështimi i statusit erdhi për shkak të mungesës së vullnetit politik. Ai theksoi se klasa politike nuk duhet të bllokojë integrimin për interesa elektorale.
“Duhet me kohë ta kishim fituar statusin e vendit kandidat që prej vitesh. Është mungesë e vullnetit politik që ka sjellë këtë ngërç të pamerituar për Shqipërinë dhe shqiptarët. Shqiptarët treguan si askush tjetër që janë në nivelin e marrjes së përgjegjësive dhe të respektimit të marrëveshjeve që bëhen me Europën. E treguan më së miri me liberalizimin e vizave. Është momenti që klasa politike të ngrihet në nivelin e qytetarëve tanë, të mos bllokojë integrimin evropian të vendit për interesa të afërta elektorale. Shqiptarët do të dinë të vlerësojnë kontributin që jep gjithsecili për zhvillimin dhe progresin e vendit, do të dinë, edhe të ndëshkojnë pengesat që gjithsecili vendos në mënyrë të padrejtë ndaj vendit dhe gjithë qytetarëve tanë”, tha kryetari i LSI-së.