Meta: Rritja e LSI-së sapo ka filluar

Kreu i Lëvizjes Socialiste për Integrim, Ilir Meta, thotë se zgjedhjet e 23 qershorit shënuan nisjen e rritjes së  kësaj partie. Gjatë një takimi me anëtarë dhe simpatizantë të LSI-së në Çorovodë, Meta u shpreh se LSI ka bërë premtimet më të përmbajtura gjatë fushatës.

“Motoja jonë për të ardhmen është të punojmë çdo ditë dhe të përmirësohemi çdo ditë në mënyrë që të jemi më të aftë dhe më të suksesshëm në përballimin e gjithë sfidave që kemi përpara. Ne kemi bërë fushatën më pozitive, kemi bërë fushatën më konkrete, kemi pasur premtimet më të përmbajtura dhe më racionale e kemi përqendruar qartë mesazhin e fushatës sonë tek të gjithë votuesit që kërkojnë stabilitetin e vendit, që kërkojnë zgjidhjen e problemeve më të mprehta ekonomike e sociale, që kërkojnë rritjen e punësimit dhe njëkohësisht për ne është tepër e rëndësishme tani të fillojmë punën për mbajtjen e këtyre premtimeve”, tha kryetari i LSI-së.

Meta tha se forcimi i mëtejshëm i LSI çon në rritjen e stabilitetit të vendit dhe ndihmohet çdo qytetar shqiptar që të shikojë një politikë, e cila merret me ekonominë dhe nuk merret retorika boshe.

“Rritja e LSI-së është mesazhi më i qartë se shqiptarët duan të ecin më shpejt në rrugën e stabilitetit, në rrugën e ndryshimeve, në rrugën e integrimit, në rrugën e punësimit, në rrugën e përqendrimit të gjithë energjive të politikës tek ekonomia, tek punësimi tek çështjet më jetike që kanë qytetarët tanë në Berat, në Skrapar dhe në të gjithë Shqipërinë”, tha z. Meta.