Metamorfoza e pemës së Krishtlindjeve

Sot ndizen dritat (Bashkia nuk duroi dhe i ndezi që mbrëmë). Të paktën historia e festës së Krishtlindjeve dhe Vitit të Ri, datën 6 dhjetor e njeh si momentin kur dekori ka përfunduar, spina vendoset në prizë dhe… festat janë zyrtarisht të hapura. Në Tiranë ka filluar të ndihet atmosfera, madje ka pasur nga ata që nuk kanë pritur datën 6, siç bëri mbrëmjen e djeshme dhe kreu i Bashkisë së Tiranës, Lulëzim Basha. Ne kemi bërë një vëzhgim në dyqanet e kryeqytetit, te të cilat, në pamje të parë duket se mund të gjesh gjithçka, që nga një top i vogël 500-lekësh e deri tek një pemë 200 mijë lekë.

Gazmend Qorraj është pronar i një dyqani ku edhe nëse nuk ke lekë në xhep për të blerë diçka, atmosfera e krijuar të imponon që të futesh brenda. Sa hedhim hapin e parë brenda, përveç pemës në formën tradicionale, shohim edhe atë të kthyer mbrapsht. Po po, këtë vit në treg ka edhe pemë të kthyer me kokë poshtë. Sipas Gazmendit, kjo është një nga tendencat më të reja këtë fundvit. Ka qenë edhe vitin e kaluar. Në këtë dyqan çmimi i saj është 390 mijë lekë të vjetra, e lartë 170cm.

Nga ana tjetër Gazmendi pohon se këtë vit mbizotëron e bardha. “Vitin e kaluar ka qenë tendencë e bardha, këtë viti sikur ka ndryshuar. Po sa e preferojnë shqiptarët këtë tendencë? Gazmendi thotë që është përqafuar goxha. “Gjënë e bukur të gjithë e duan, shqiptarët kanë nevojë për atmosferën e festave. E marrin edhe të bardhën. Njerëzit janë të prirur t’u binden tendencave”.

Gazmendi me 20 vjet eksperiencë në këtë treg na tregon se ka filluar të përdoret në masë lulja në pemë dhe ajo për të cilën duhet të kemi kujdes është ndriçimi. Duhet të kombinojmë dritat në bazë të ambientit që disponojmë. Gazmendi e mbyll bisedën me ne: “Ai që e do gjënë e bukur vjen edhe pa pasur mundësi. Me ato 5 lekë që ka afrohet dhe e blen.” Largohet t’u shërbejë klientëve duke na lënë në rrëmujën e ëmbël të këtyre zbukurimeve.

Pema e Krishtlindjeve

Vendosja e pemës se Krishtlindjeve e ka zanafillën në shekullin 15 në Estoni, dhe më pas në Gjermaninë e Veriut në shekullin 16. Tradita është trashëguar deri në ditët e sotme. Zbukurimi nis më 5 dhjetor në mënyrë që data 6 ta gjejë gati me dritat ndezur. Ngritja e pemës së Krishtlindjeve paralajmëron ardhjen e festave të fundvitit që shoqërohen me oferta për blerjet. Pema e Krishtlindjeve është kthyer tashmë në traditë jo vetëm për shtëpitë, por edhe për lokalet. Sado e vogël qoftë, ajo gjithmonë sjell atmosferë. Ngjyra e kuqe simboli i festës, këtë vit vjen edhe në versionin e lejlasë apo vishnjës, me lartësi 1-8.5m për hapësira të mëdha. Globet me ngjyra nuk dalin lehtë nga moda e Krishtlindjeve, por duke se lulet po joshin më shumë shijet e klientëve.