Ministria e Zhvillimit Ekonomik, Turizmit, Tregtisë dhe Sipërmarrjes propozon një projektligj të ri në të cilin vendosen parimet themelore për të drejtën e vendosjes për ofruesit e shërbimeve si edhe garanton ofrimin e shërbimeve sa më cilësore për konsumatorët.
Projektligji i cili është depozituar për shqyrtim në Kuvend synon të përcaktojë kuadrin ligjor sa i përket parimeve themelore dhe kritereve të domosdoshme për këdo që kërkon të ushtrojë çdo lloj veprimtarie ekonomike apo/edhe me karakter intelektual e cila kryhet përmes vetëpunësimit/sipërmarrjes private kundrejt një shpërblimi.
“Projektligji, i propozuar për herë të parë ofron një rregullim horizontal, i cili në asnjë rast nuk pengon rregullimet sektoriale, me kusht që këto të fundit të respektojnë parimet themelore dhe kriteret e përcaktuara në këtë projektligj sa i përket të drejtës së vendosjes për ofruesit e shërbimeve, me qëllim garantimin e ofrimit të shërbimeve sa më cilësore nga ofruesit e shërbimeve për përfituesit”, thuhet në relacionin shoqërues.
Deri sot këto lloj veprimtarish janë rregulluar nëpërmjet vetëdeklarimit të fillimit të aktivitetit në përputhje me ligjin “Për tregtarët dhe shoqëritë tregtare”, si dhe për profesione të veçanta, nëpërmjet ligjeve sektoriale, apo nëpërmjet statuteve, kodeve të etikës dhe rregulloreve e urdhrave profesionale/dhomave kombëtare ose organizmave të tjera profesionale.