Rreze shprese për buxhetorët që prej ditësh presin rrogat. Pagesat e muajit dhjetor për punonjësit e administratës do të fillojnë sot, bën të ditur Shqiptarja.com, e cila u referohet burimeve të saj në Ministrinë e Financave.
“Kalimi në sistem i pagave përfundon totalisht në mesditë. Drejtoria e Thesarit po punon edhe në këto momente për të hedhur në sistem të gjitha të dhënat. Përfundoi Ministria e Brendshme, e Arsimit, pensionet, ndihma ekonomike, Ministria e Punës etj”, deklaroi zyra e shtypit e Ministrisë së Financave.
Rreth 90 mijë punonjës të administratës shtetërore janë përballur me vonesën e pagave të dhjetorit, të cilat duhej të kishin kaluar në llogaritë e tyre bankare duke nisur nga data 3 janar. Opozita e cilësoi këtë vonesë njëjavore si shenjë të krizës ekonomike, të cilën qeveria përpiqet ta fshehë, ndërsa kryeministri tha dje vonesa erdhi për faj të zyrave financiare të institucioneve shtetërore, të cilat kanë dërguar vonë listë-pagesat e punonjësve.