Ministria e Jashtme greke për negociatat, i kujton kushtet Shqipërisë

Pas rekomandimit të Komisionit Evropian për hapjen e negociatave, Ministria e Jashtme greke, përmes një deklarate thekson se Greqia është “duke punuar për të përmirësuar marrëdhëniet dypalëshe me Shqipërinë”.

Kjo Ministri thekson se Greqia në mënyrë të vendosur mbështet procesin e anëtarësimit të Shqipërisë në Bashkimin Evropian, duke shtuar se duhet të përmbushen të gjitha kushtet e përcaktuara. E në këtë rast, Greqia ndalet tek shqetësimi i saj i përhershëm, ajo e pakicave kombëtare.

“Siç është bërë e qartë në raportin e Komisionit Evropian, respektimi i të drejtave të minoritetit grek është i lidhur drejtpërdrejt me perspektivën evropiane të Shqipërisë dhe është pjesë integrale e pesë prioriteteve kryesore për hapjen e negociatave të vendit për anëtarësim në BE, përmbushja e të cilave do të trajtohet nga Këshilli i Evropës.

 Në këtë kontekst, ne presim garanci për të drejtat e minoritetit në të gjithë Shqipërinë, një masë që Shqipëria kishte ndërmarrë për ta miratuar deri në maj 2018, dhe zbatimin e ligjit të pronësisë për anëtarët e minoritetit”, thuhet në deklaratë.

Më tej shprehet shqetësimi për pengimin sipas tyre të kandidaturës së Fredi Belerit për të kandiduar si i pavarur për Bashkinë e Himarës.

“Këto veprime shkelin të drejtën e patjetërsueshme të përfaqësimit politik të Pakicës Kombëtare Greke në zgjedhjet komunale në Himarë”, thuhet më tej.

Ministria e Jashtme greke e mbyll deklaratën me një thirrje për Shqipërinë.

“Ne i bëjmë thirrje Shqipërisë që të kthehet në drejtim të përparimit dhe jo të bëjë hapa pasa, në mënyrë që procesi i saj i pranimit të vazhdojë”.

b.b/dita