Ministria e Jashtme serbe notë proteste ambasadorit shqiptar

Serbia tensionon situatën në prag të ndeshjes mes dy kombëtareve.

Ministria e Punëve të Jashtme e Serbisë i ka paraqitur një notë proteste ambasadorit të Shqipërisë në Beograd, në lidhje me incidentin e ndodhur ndaj kombëtares serbe rrugës nga Rinasi për në Tiranë.

Siç thuhet në një njoftim, të cilin e citon agjencia serbe e lajmeve “B92”, Ministria e Jashtme ka thirrur urgjentisht ambasadorin Ilir Boçka, të cilit i ka dorëzuar notën e protestës.

“Përkundër faktit se është një event me rrezik të lartë, incidenti dëshmon për neglizhencë serioze të shërbimeve kompetente të Shqipërisë në organizimin e kësaj ndeshjeje futbolli”, thuhet në deklaratë.

Republika e Serbisë, vijon dokumenti, pret dhe kërkon që ekipit serb të futbollit t’i garantohet plotësisht siguria gjatë qëndrimit në Shqipëri dhe që ndeshja të luhet e qetë.

“Gjithashtu presim që autorët e këtij incidenti të zbulohen menjëherë dhe të dënohen në mënyrë adekuate”, vijon njoftimi.

Gjatë rrugës nga aeroporti i Rinasit për në Tiranë, autobusi serb u godit me gurë, një incident që gjithësesi nuk shkaktoi trazira apo të lënduar.

Megjithatë, presidenti i Federatës Serbe Tomislav Karaxhiç, i cituar po nga “B92”, tha se ndeshja me Shqipërinë mund të jetë e diskutueshme nëse incidentet vazhdojnë.