Edhe në rastet kur PD dhe PS arrijnë konsensusin me vota, sërish përfaqësuesit e tyre nuk i shpëtojnë konfliktualitetit. Kjo ka ndodhur dhe në Komisionin e Ligjeve, ku diskutimi për Kodin Penal shkaktoi një përplasje verbale, mes Ministres së Integrimit, Majlinda Bregu dhe deputetes socialiste, Ermonela Felaj.
“Pa shiko Kodin Penal, ka 12 vjet që ka këtë që propozon ti për marrëdhëniet seksuale me dhunë. Shih Kodin para se të sjellësh propozimët”, iu drejtua deputetja Felaj ministres Bregu.
Ndërsa Bregu iu përgjigj: “Meqënëse e ngre zërin, këtë e ke element të dobësisë dhe mungesës tënde të intelektit. Neni 102 parashikon marrëdhëniet seksuale me dhunë me të rritur, jo brenda familjes, prandaj lexoje me kujdes dhe shpresoj të ketë mbetur diçka sa për ta kuptuar. Je ti ajo që ke nxjerrë nga burgu ata që kanë trafikuar gratë dhe ke shkuar në çështje penale. Ke probleme shumë të mëdha gjatë historisë tënde”.
Ministrja e Integrimit është propozuese e një seri ndryshimesh në Kodin Penal kundër dhunës në familje, të cilat iu bashkangjitën paketës së amendimeve të ministrit Halimi.
Kodi Penal, ligj me 84 vota, mori konsensusin e opozitës në parim dhe parashikon rritje të viteve të burgut për vrasjet e policëve dhe dhunën ne familje. Arsyeja për këto ndryshime, sipas ministrit Halimi, është dënimi qesharak për vrasjet në mbarë vendin.
“600 çështje penale kishin shkuar nga Prokuroria në Gjykatë dhe nga këto, 90 përqind e tyre prokurori kishte kërkuar minimumin e dënimit. Nga 600 çështje vetëm 20 kishin shkuar në Apel, pse? Sepse gjyqtarët, prokurorët dhe avokatët kishin gjetur hapësirën ligjore, kishin shkuar me minimumin e dënimit”, deklaroi Halimi.
Po me konsensus u miratua rritja e pagave të gjyqtarëve, por këta të fundit do të mund të përfitojnë nga ky ndryshim vetëm në janar të vitit të ardhshëm, pasi fatura financiare prej 203 milionë lekëve detyron ndryshime në buxhet, të cilat, nuk mund të kryhen para zgjedhjeve.