Mjekët që dalin në pension, duhet të lënë punën

Ndonëse mbushin moshën e pensionit, shumë prej mjekëve të shërbimeve të ndryshme në Qendrën Spitalore Universitare “Nënë Tereza”, kërkojnë që të vijojnë edhe më tej punën në specialitetin e tyre. Duket se kërkesat e bëra nga mjekët për të vijuar qëndrimin në punë, edhe pse kanë mbushur moshën e pensionit kanë qenë të shumta, aq sa kanë nxitur edhe reagimin e kreut të shëndetësisë Ilir Beqajt. Gjatë analizës një vjeçare të punës së QSUT-së, në fund të fjalës së tij ministri Beqaj u ka kërkuar mjekëve që t’i japin fund ndërhyrjeve dhe kërkesave për të vijuar punën pasi kanë mbushur moshën e pensionit. Sipas ministrit mjekët që kanë mbushur moshën e daljes në pension duhet të lënë punën, duke liruar vendet edhe për mjekët më të rinj. ”Dalja në pension ose plotësimi i kushteve të pensionit është një ngjarje e parashikuar në jetë. Ju lutem përpiquni të mi reduktoni kërkesat për të punuar edhe pas moshës së pensionit”, është shprehur ministri Beqaj, para drejtuesve të shërbimeve të kësaj qendre spitalore.