Moisiu: Vendi ka nevojë për rotacion. Të ikë Berisha, të provojmë Ramën

Ish-presidenti i Republikës, Alfred Moisiu, shpreh nevojën që ka vendi për rotacion politik. Në një intervistë për A1 Report, Moisiu thotë se duhet të provohet Edi Rama,  ndërsa  forcat politike duhet të gjejnë zgjidhje për të forcuar shtetin. Moisiu dha idenë e largimit të Berishës nga PD, duke deklaruar se e ka kthyer atë nga demokratike, në një parti familjare. Ish-presidenti u bëri thirrje qytetarëve të shkojnë të gjithë në votime; të vrasin frikën dhe të kërkojnë ndryshimin për jetët e tyre.

Moisiu shprehet se një nga arsyet që e mban Shqipërinë mbrapa vendeve të tjera është prania në politikë e “figurave të vjetra”.

“Pikërisht unë e kam thënë edhe herë të tjera; nëse do të shohim në rajon asnjë nuk ke të këtyre viteve në politikën aktive, në poste kryesore, as në Maqedoni, as në Kroaci, Serbi etj. Pse? Sepse çdo periudhë ka njerëzit e saj, është një kërkesë e zhvillimit. Kjo për mendimin tim është një nga arsyet që ne na mban prapa, që na frenon. Secili ka dhënë një kontribut, por për këtë kontribut që ke dhënë dikur nuk mund të pengosh sot zhvillimin e vendit”, thotë ai.

Moisiu thotë se në këtë kategori, më kryesori është kryeministri Berisha. “Praktikisht ai ka mbetur, si më kryesori. Por nuk është problem që mbetet, apo çështja e moshës. Mosha ka ndikimin e saj, por barrën e ka mentaliteti i individit, predispozicioni që ka, nëse sakrifikon për vendin je i dobishëm, por nëse punon vetëm për familjen tënde, për partitë tënde dhe për të mbajtur pushtetin me thonj, atëherë…. Unë mendoj që ai ka defekte të rënda. Dhe pikërisht për këtë arsye ka ardhur koha për rotacion, duhet ta lëshojë vendin forcave të reja që vendi të ecë përpara”, shprehet Moisiu.

Ish-presidenti shprehet se vendi ka nevojë për rotacion dhe ndryshim cilësor.

Me fjalën rotacion unë personalisht, por dua që edhe gjithë të tjerët ta kuptojnë kështu: unë nuk kuptoj vetëm që të iki njëri dhe të vijë tjetri. Them se duhet të ndërtohet shteti, pra të kemi një ndryshim cilësor. Sepse e thamë se ky shteti jonë është problematik. Të ndërtojmë shtetin. Ne kemi një polici dhe unë e kam thënë edhe tek Fyle gjatë takimit që kemi bërë me të: Ju keni kontribuar me Pameca-n, por çfarë kemi bërë? Kemi bërë këtë: që kemi një polici në detyrë dhe një e kemi në shtëpi. Policia është e shtetit, nuk është e PD apo e PS. Po kështu po kthehet tani. Ka edhe shumë probleme të tjera dhe ne duhet të ndërtojmë shtetin. Dhe unë mendoj nëse e majta vjen në pushtet duhet vërtet të bëjë detyrën e saj, jo thjesht të iki një palë dhe të vijë një palë, por për të nxjerrë Shqipërinë nga ky batak”.