Mjeku i QSUT: Gjykata dha drejtësi, më ngritën një kurth

Nuk ka qëndruar as 24 orë në qeli shefi i Kirurgjisë së Spitalit të Djegieve në QSUT. Ilir Broqi ka lënë sallën e gjyqit i lirë dhe i gëzuar ditën e djeshme, pasi Gjykata e Tiranës e quajti të paligjshëm arrestimin e tij nga policia dhe prokuroria për akuzën e korrupsionit pasiv të funksionarëve. Por nuk ka pasur të njëjtin fat i dyshuari si sekser, Arben Doda, ish-punonjës i sigurisë në spitalin “Nënë Tereza”, ndaj të cilit rëndon akuza “ushtrim i ndikimit të paligjshëm ndaj funksionarëve publikë”. Ndaj tij u dha masa “arrest me burg”, kurse ndaj mjekut Broqi, “detyrim paraqitjeje”. Broqi mohoi akuzën, kurse avokati e quajti inskenim ndalimin e tij dhe pa prova.

Lirimi i Broqit

Seanca nuk zgjati më shumë se gjysmë ore dhe me dyer të mbyllura. Prokuroria deklaroi se ka provat e korrupsionit. Por gjykata vendosi se arrestimi ishte i paligjshëm. Pasi la qelinë, shefi i Kirurgjisë u shpreh i kënaqur. “Jam i lumtur që pati drejtësi nga gjykata. Gjykata e vlerësoi arrestimin të paligjshëm. Mu bë një kurth për shkak të detyrës”, u shpreh mjeku. Ndërkohë gjykata ka lënë në burg sekserin Arben Doda, ndaj të cilit rëndon akuza se mblidhte lekët 15-17 mijë lekë për secilin pacient duke i privilegjuar për shërbimin e skanerit. Sipas gjykatës, arrestimi i Broqit ka qenë i paligjshëm pasi nuk ka prova të mjaftueshme. Prokurorisë do i duhet të gjejë prova të tjera për të rikthyer në qeli bluzën e bardhë.

Arrestimi

Policia e Tiranës e arrestoi mesditën e së premtes, me urdhër të prokurorisë në kuadër të operacionit të koduar “Skaner 2013”, përgjegjësin e sektorit të aktivitetit kirurgjikal në Qendrën Spitalore Universitare “Nënë Tereza”, Ilir Broqi. Gjithashtu është vënë në pranga edhe Arben Doda, i cili dyshohet se është sekseri i mjekut, ndërsa ndaj tij rëndon vepra penale “ushtrim i ndikimit të paligjshëm ndaj personave që ushtrojnë funksione publike”. Broqi s’e pranoi akuzën, kurse prokuroria tha se bëri disa javë hetime dhe kapi në flagrancë mjekun që merrte paratë për të sëmurët e pavionit të djegieve (plastikës). Pasi merrnin paratë, pacientët përfitonin shërbimin e skanerit të përgjithshëm.

Urdhri i Mjekut

Pas arrestimit të mjekut ka reaguar edhe Urdhri i Mjekut. Kreu i tij, Dine Abazi, dënoi çdo lloj forme të korrupsionit në sistemin shëndetësor, por ka rezerva në mënyrën se si ky fenomen po luftohet. Ai hodhi akuza të forta për drejtuesit e institucioneve shëndetësore.

Operacioni

Në operacion ka bashkëpunuar edhe Prokuroria e Tiranës, kurse ndalimi është kryer në momentet e flagrancës, në ambientet e spitalit. “Nga hetimet e kryera në kuadër të këtij procedimi penal ka rezultuar se Arben Doda, ish-punonjës i sigurimit të Q.S.U.T-së, u kërkonte dhe u merrte në emër të doktor Ilir Broqaj qytetarëve të ndryshëm shuma nga 15000 lekë të reja, deri me 17000 lekë të reja, në funksion të kryerjes së skanerit të përgjithshëm në Qendrën Spitalore Universitare “Nënë Tereza” Tiranë”, thanë burime zyrtare të policisë së kryeqytetit për gazetën “DITA”. Broqi nuk e ka pranuar akuzën gjatë marrjes në pyetje, duke e quajtur sajesë dhe inskenim. Por grupi hetimor sqaroi se janë kryer hetime të ligjshme me metoda speciale, bashkë me prokurorinë dhe ka prova të besueshme të këtij korrupsioni. Mësohet se ka përgjime telefonatash, denoncime qytetarësh, dëshmi dhe ankesa të ndryshme, si dhe momenti i fotografimit dhe filmimit të procedurave të marrjes së lekëve dhe dorëzimit të tyre. Sipas hetimeve të kryera rezulton se duke paguar shumën e mësipërme, qytetarë të ndryshëm që kishin të afërmit e tyre në spitalin e djegieve, përfitonin shërbime për operacione dhe kontrolle, sipas shkallës së vështirësisë dhe shërbime të tjera. Kështu veprohej me pothuajse të gjithë pacientët.

Hetimet

Pas ankesave që ka pasur drejtoria e spitalit, është kërkuar që qytetarët të bënin denoncime konkrete dhe më tej janë ndjekur metoda speciale investigimi bashkë me prokurorinë, që ka miratuar arrestimin në kushtet e flagrancës së Broqit dhe të të dyshuarit si sekser. Gjithashtu si provë janë bllokuar edhe shuma e lekëve e dorëzuar në kushtet e flagrancës. Policia tha se po vijohet me hetime dhe mbledhje të të tjera denoncimeve ndaj bluzave të bardha për korrupsion me të sëmurët. Ditën e djeshme, pas marrjes në pyetje të të dyshuarve dhe komunikimit të akuzave përkatëse, dosja penale iu kalua Prokurorisë së Rrethit Tiranë për veprime të mëtejshme.