Muho: Nuk jap dorëheqjen, më heq vetëm ligji

I gjendur në qendër të vëmendjes së politikës dhe mediave prej disa ditësh, anëtari i KQZ-së, Ilirian Muho, deklaron se nuk ka ndërmend të japë dorëheqjen. Muho thotë se është në ushtrim të funksionit të tij dhe në momentin që është votuar nga Parlamenti është betuar për paanësi. “Unë jam anëtar i KQZ para fillimit të detyrës kam bërë betim për profesionalizëm, për zgjedhje transparente. Nuk mund të bëj deklarata politike për subjektet politike, këto janë komente dhe deklarata që për shkak të funksionit që kryej nuk mund të bëj komente. Nuk jap dorëheqjen se jam në ushtrim dhe funksion të detyrës. Jam anëtar i KQZ. Është i vërtetë fakti se jam kandidaturë për LSI, por në momentin e përzgjedhjes së kandidaturës sime gjeti mbështetje dhe tek mazhoranca e asaj kohe. Pas seleksionimit të kandidaturave u paraqit kandidatura ime dhe në fillim të detyrës u betova para Kuvendit për punën time. Hiqem nga ligji dhe vetëm nga ligji”, u shpreh ai gjatë kohës që KQZ po zhvillonte testin e parë të numërimit elektronik të votave.

Muho: Nuk jam anëtar i LSI në KQZ, por i pavarur. S’më shkarkojnë dot

12 prill– E ndërsa Partia Demokratike është tërhequr nga procedurat për shkarkimin e Ilirian Muhos dhe ambasada amerikane reagoi ashpër ndaj kësaj tentative, anëtari i Komisionit Qendror të Zgjedhjeve, vazhdon normalisht punën e tij.

Në intervistën e tij për “AS”, ai thotë se do të vazhdojë të qëndrojë në detyrë pavarësisht kërkesës për ta shkarkuar.“Nuk më intereson se çfarë do të bëjë Kuvendi, ajo që më intereson është zbatimi i ligjit, zbatimi i Kodit Zgjedhor. Unë jam në detyrë, vazhdoj të kryej detyrën, jam nën betim”, deklaron Muho. Ai kujton votën pro heqjes së një mandati në Berat, në kohën kur shpërndarja e deputetëve nëpër qarqe ishte një çështje e nxehtë në KQZ dhe kundërshtohej nga LSI, kur thotë se në ushtrimin e detyrës së tij i ka qëndruar larg ngjyrave të partisë që e propozoi.

“Nuk jam përfaqësues i LSI-së në KQZ, jam përfaqësues i grupimeve të partive të opozitës dhe unë udhëhiqem në punën time nga ligji dhe vetëm ligji”, u shpreh Muho.

Ndërsa sa i përket kërkesës së mazhorancës për ta zëvendësuar me një përfaqësues të partisë Republikane, Muho thotë se: “Në dijeninë time KQZ nuk i ka dërguar ndonjë kërkesë për shkarkimin tim. KQZ nuk është mbledhur për të konstatuar ndonjë shkelje nga unë në veprimtarinë time, dhe për sa kohë që nuk ka një kërkesë të tillë, mbetem absolutisht i befasuar sepse procedura e shkarkimit të anëtarit të KQZ është një procedurë e përcaktuar në mënyrë rigoroze në Kodin Zgjedhor”.