Kërcënimi i Mziut: Fitoni gjyqin, ose ju hoqa nga puna!

Zbardhen detaje të tjera nga dosja hetimore në ngarkim të kryebashkiakut të Kamzës, Xhelal Mziu dhe dy vartësve të tij nën akuzë, Alti Hoti, drejtor Juridik dhe Bujar Loshi, drejtor i Tatim-Taksave në bashki. Ndaj tre funksionarëve të lartë janë depozituar 4 kallëzime penale, ku dy i përkasin kompanive private “Albavia” dhe “Gjoka”, për shkak të mbitaksimit dhe bllokimit të llogarive bankare dhe dy të tjera lidhen me tenderin e rrugës Valias i Ri-Laknas, me vlerë 80 milionë lekë, duke penalizuar firmën “Gjoka” si fituese dhe duke ia dhënë një tjetër kompanie. Kjo dosje është ende nën hetim. Prokuroria e Tiranës ka çuar në gjykatë dosjen për kallëzimet e dy kompanive private. Dje gazeta “Dita” publikoi çështjen e “Albavia”, kurse sot po publikojmë materiale pikante të dosjes për ‘revanshin’ e Mziut ndaj kompanisë “Gjoka”, ku bie në sy shkresa me shënimin e gjetur nga organi i akuzës; Fitoni gjyqin në favor të Bashkisë, ndryshe ju pushova nga puna!

Çështja “Gjoka”

Kompania e ndërtimit të rrugëve “Gjoka sh.p.k” ka një aktivitet të vjetër në Kamëz prej vitit 2004 dhe paguese e taksave sistematikisht, për shfrytëzim të hapësirës dhe të ndërtesës. Por në vitin 2008, kryetari i bashkisë, Xhelal Mziu vendos rritjen e ndjeshme të taksave, ashtu si për kompaninë “Albavia”. Nga viti 2004-2007 detyrimet e paguara ishin 169,800 lekë. Kurse vetëm për vitin 2008 duhet të paguante 1,3 milionë lekë dhe për më tepër pa dokumente përllogaritje të taksës. Kompania e çon çështjen në Gjykatën e Tiranës, pasi Mziu nuk merr parasysh kërkesën. Por megjithëse fiton gjyqin, kryebashkiaku në vitin 2009 urdhëron tjetër përllogaritje për ndërtesën dhe hapësirën, për 34 mijë metrat katrorë të firmës. Kompania argumenton se ishte pronë private e saj me dokumente, por Mziu rrëzon ankimimin, duke e çuar në shenjë hakmarrje taksën 3,1 milionë lekë të reja. Çështja dërgohet përsëri në gjykatë dhe rezulton se firma duhet të paguante vetëm 4,3 milionë lekë në total për të gjitha detyrimet e përllogaritura në vite dhe jo 7,4 sa e kishte vendosur bashkia. Në shenjë hakmarrje përsëri, më 7 maj 2011, Mziu nxjerr përsëri urdhër rivlerësimi tatimor, duke i çuar detyrimet e kompanisë “Gjoka” në 13,6 milionë lekë të reja. Çështja shkon përsëri në gjyq dhe më 27 mars vendoset shfuqizimi i urdhrit të të pandehurit Mziu. Nga verifikimi i dokumenteve prokuroria ka gjetur një shkresë, ku i njoftuar për vendimin e gjykatës, Mziu kishte bërë shënimin: “Urgjent për mbrojtje në shkallë të tjera, do të jetë kusht për largim nga puna të të dyve nëse nuk fiton Bashkia”!. Kërcënimi i drejtohet pikërisht kreut të Taksave dhe Zyrës Juridike.

Përgjegjësitë penale

Për këtë çështje është ngritur akuzë për “shpërdorim të detyrës” ndaj kryebashkiakut Xhelal Mziu dhe kreut të Tatim-Taksave, Bujar Loshi. Gjyqi i kompanisë është mbyllur definitivisht në qershor 2013, ku Apeli i dha të drejtë të mos i paguante taksat e tepërta. Nga hetimet prokuroria shkruan në dosje se “për shkak hakmarrje kryebashkiaku ka penalizuar me përjashtim nga tenderët kompaninë “Gjoka” në vijimësi”. Kështu ndodhi edhe në tenderin 80 milionë që ajo ka fituar. Kompania “Albavia” ka paguar 12 milionë lekë të reja taksa më tepër dhe “Gjoka” 5 milionë lekë më tepër, duke u dëmtuar.