Naryshkin: NATO-ja është kanceri i Europës

Kreu i Dumës ruse, Sergey Naryshkin, thotë se Rusia është e shqetësuar nga zgjerimi i NATO-s. Ai thotë se do të ishte në interes të sigurisë globale shkrirja e kësaj aleance ushtarake.

“Qëndrimi im ndaj kësaj organizate është i veçantë. Unë e shoh si një kancer në kontinentin e Europës. Do të ishte mirë sikur kjo organizatë të shkrihej”, tha Naryshkin gjatë një takimi me disa deputetë serbë.

Naryshkin shkon më tej kur propozon fazat e shkrirjes së bllokut ushtarak. “Para se gjithash, SHBA-të duhet të përjashtohen nga ky bllok, pasi do të ishte më e lehtë shpërbërja e mëtejshme e tij. Ky do të ishte një hap i mbarë drejt sigurisë dhe stabilitetit në të gjithë kontinentin”, thotë ai.

Naryshkin u tha ligjvënësve serbë se Rusia është njohur me faktin se një pjesë e madhe e qytetarëve të Malit të Zi e kundërshtojnë anëtarësimin e vendit në NATO.

Ai tha se në fund të nëntorit, Duma Ruse i bëri thirrje Parlamentit malazias të braktiste planin për të hyrë në NATO dhe shtoi se shpreson që politikanët serbë do të arrijnë të bindin Malin e Zi për të mos hedhur këtë “hap të rrezikshëm”.

Në fillim të dhjetorit, ministrat e Jashtëm të NATO-s ranë dakord për të ftuar Malin e Zi të bëhej anëtare e aleancës. Në shtator, Parlamenti i Malit të Zi votoi një rezolutë që mbështeste hyrjen e vendit në aleancën ushtarake.

Opozita kërkoi mbajtjen e një referendumi mbi këtë çështje, por nuk ndërmori hapa të tjerë.

Moska ka deklaruar se do të ketë një përgjigje nëse Mali i Zi anëtarësohet në NATO, por nuk ka dhënë detaje të mëtejshme. Një zyrtar i lartë rus tha se përgjigjja mund të jetë reduktimi i disa projekteve të përbashkëta me Malin e Zi, përfshirë këtu edhe ato ushtarake.