Ndahen 12 çmimet LGBT (dhe një batutë e Lubonjës)

Në hollin kryesor të Muzeut Historik Kombëtar lëvizja LGBT në Shqipëri ekspozoi sot rreth 40 objekte të komunitetit LGBT nga Shqipëria si dhe eksponantë nga 6 muzeume të Suedisë që tregojnë jetën dhe realitetin e këtij komuniteti që nga fillimet e shekullit të 20-të.

Ekspozita e quajtur “Art. 1” bazuar në nenin 1 të Deklaratës Universale të të Drejtave të Njeriut u përshëndet nga i Ngarkuari me Punë i Ambasadës së Suedise, z. Patrik Svensen, Avokati i Popullit z. Igli Totozani, kuratori i ekspozitës nga The Unstraight Museum z. Ulf Petersson dhe mbështetës.

Gjatë kësaj ekspozite që përmban objekte nga Muzeu i Nobelit, në Suedi, ai i Sporteve, i Teknologjisë dhe madje edhe disa fotografi impresionuese të vitit 1903 nga Muzeu i Policisë, u shpallën për herë të parë 12 cmime Aleati dhe Aleatja e Vitit për LGBT.

Fatos Lubonja njëri prej fituesve të një çmimi të tillë tha në lidhje me çmimet: “Ka dy lloje çmimesh, një lloj janë ato që ti jep maxhoranca e që duhet t’i refuzosh se me siguri ke bërë diçka që nuk shkon përderisa ta japin, dhe një çmim tjetër është ai që ta jep pakica apo minoranca e ky po, është një nder dhe diçka që jo vetëm nuk mund ta refuzoj por më duhet të pyes veten se çfarë kam bërë për ta merituar”.

Përveç z. Lubonja, Aleatë të vitit, çmime të shpallura nga dy organizatat Aleanca LGBT dhe Pro LGBT, ishin znj. Delina Fico, z. Igli Totozani, znj. Desada Metaj, znj. Margarita Kristidhi, z. Gëzim Tushe, znj. Iris Luarasi, z. Mustafa Nano, z. Foto Strakosha, znj. Inida Gjata, znj. Elsa Ballauri dhe z. Arian Cani.

Ekspozita e realizuar nga The Unstraight Museum në bashkëpunim me Aleancën Kundër Diskriminimit LGBT, mbështetur nga Ambasada e Suedisë, tërhoqi vëmendjen edhe të Ambasadorit të SHBA z. Aleksandër Arvizu, i cili u tha aktivistëve se ndihej i impresionuar për faktin që në Shqipëri gjërat po ecin për mirë e se mbështetja për LGBT po bëhet gjithnjë e më e fortë.