Ndaluan makinën e administratorit të Vreshtazit, procedohen 3 anëtarët e grupit të armatosur të PD

Tre anëtarë të grupit të armatosur të PD-së “për mbrojtjen” e votës” janë proceduar në gjendje të lirë, pasi kanë vijuar aktivitetin e tyre të paligjshëm duke ndaluar makina me pretendimin se po vidhen votat.

Janë proceduar në gjendje të lirë dy vëllezërit Fatjon dhe Endrison Dushku, djemtë e Kryetarit të PD-së në Vreshtas, si edhe simpatizanti Ahmet Goroveci, të cilët janë nën akuzë për njoftim të rremë në polici dhe pengim të qarkullimit të mjeteve.

Tre personat me në krye drejtuesin politik të PD-së në qarkun e Korçës, Edmond Spaho ndaluan ditën e djeshme makinën e administratorit të Vreshtasit, Qezar Bezati dhe shoqëruesit të tij Gerti Tabaku në fshatin Podgorie, duke pretenduar se po blinin vota.

Njoftimi i policisë

“Specialistët për Hetimin e Krimeve në Komisariatin e Policisë Maliq, filluan procedimin penal në gjendje të lirë në ngarkim të shtetasve F. D., 25 vjeç; E. D., 21 vjeç dhe A. G., 54 vjeç, banues në fshatin Podgorie, Maliq (simpatizanë të një subjekti politik).

Këta shtetas në mënyrë të kundërligjshme në fshatin Podgorie, Maliq, i kishin bllokuar rrugën me automjetin e tyre shtetasit Q. B., me detyrë administrator i Njësisë Administrative Vreshtas, Maliq, i cili udhëtontë me mjetin e tij, me pretendimin se në automjet kishte lekë për të blerë vota.

Nga verifikimet e kryera dhe kontrolli i ushtruar nga ana e grupit hetimor dhe shërbimeve të policisë në automjetin e shtetasit Q. B., nuk u gjet asnjë send kompromentues, në lidhje me procesin zgjedhor.

Materialet i kaluan Prokurorisë të Rrethit Gjyqësor Korçë për veprat penale “Njoftimi i rremë në organet e rendit” dhe “Pengimi i qarkullimit të mjeteve të trasportit””, njofton Policia.

o.j/dita