Ndeshjet me Serbinë, pa tifozë udhëtues

Dy ndeshjet midis Shqipërisë e Serbisë do të ofrojnë një ngarkesë të lartë emocionale, ndaj në secilën prej tyre mund të ndalohet udhëtimi i tifozëve të skuadrës mike. Takimi i parë do të luhet më 14 tetor të këtij viti në Beograd, ndërsa kthimi do të jetë më 8 tetor 2015 në “Ruzhdi Bizhuta” të Elbasanit. UEFA mund të vendosë që të mos ketë tifozë udhëtues në secilën prej ndeshjeve, ashtu siç u vepruar në takimet midis Serbisë e Kroacisë në kualifikueset e botërorit brazilian. Këtë gjë e ka pohuar sekretari i federatës serbe, Zoran Lakoviç, i intervistuar nga radio B92. “E dimë që do të jenë dy ndeshje tepër të rrezikshme për sa i përket atmosferës, por besoj se me eksperiencën e akumuluar gjatë këtyre viteve do të dimë se si të përgatisim këto sfida, duke u takuar edhe me drejtuesit e Federatës Shqiptare të Futbollit, që do të na japin udhëzimet e duhura”, thotë Lakoviç. “Kemi marrë informacion se s’do të zhvillohet në kryeqytet ndeshja dhe besojmë se kjo është gjë e mirë, por një tjetër gjë pozitive mund të jetë grumbullimi jashtë qytetit kryesor, pra që të mos ketë probleme. Ne kemi zhvilluar disa ndeshje me Kroacinë, ku pak a shumë është e njëjta situatë, ndaj e dimë se çfarë na pret dhe se si duhet të përballemi”. Edhe pse është e pashmangshme shfaqja e ndjenjave nacionaliste, kapiteni i kombëtares serbe, Branislav Ivanoviç, përpiqet ta ftohë situatën dhe të flasë vetëm për futboll. Në aspektin teknik ai e konsideron skuadrën e tij më të fortë se kuqezinjtë, çka e rrit presionin te Shqipëria. “Nuk duhet t’i shikojmë këto dy sfida përtej kuadrit futbollistik. Mendoj se shqiptarët kanë më shumë presion se ne, sepse Serbia ka kombëtare më cilësore. Gjithsesi, unë dua të mendoj për kualifikimin sepse në Euro 2016 do të shkojmë vetëm nëse shfaqemi më mirë se Danimarka, Armenia dhe Shqipëria”, thotë mbrojtësi i Chelsea-t, i cili e konsideron Portugalinë si favorite të paarritshme në grup.