SHSSH padit Xhelal Mziun për abuzim me ndihmën ekonomike

Pas akuzës për shpërdorim detyre dhe shkelje të barazisë në tendera, për të cilat është ende nën hetim, një tjetër kallëzim për kryebashkiakun e Kamzës.

Shërbimi Social Shtetëror i Ministrisë së Mirëqenies Sociale dhe Rinisë ka kallëzuar në Prokurorinë e Rrethit të Tiranës, kryetarin e Bashkisë Kamëz, kryetarin dhe anëtarët e Këshillit Bashkiak Kamëz, punonjësit e seksionit të NE dhe AK të Bashkisë Kamëz  dhe ish-sekretarin e Përgjithshëm të Prefektit të Qarkut Tiranë me motivacionin e shpërdorimit të detyrës.

Pas kontrollit të ushtruar në Bashkinë Kamëz nga auditi i Drejtorisë Rajonale të Shërbimit Social Shtetëror për periudhën janar-dhjetor 2013, u konstatuan një sërë shkeljesh ligjore që ngarkojnë me përgjegjësi funksionarët e sipërpërmendur.

Auditi konstatoi se numri i përfituesve të ndihmës ekonomike në Bashkinë Kamëz, i cili deri në muajin mars ishte 3100 familje, në muajin maj 2013 ka shkuar në 6280 familje, duke u dyfishuar.

Rritja e menjëhershme e numrit të personave që përfitonin ndihmë ekonomike përkon me nisjen e fushatës për zgjedhjet parlamentare të 23 qershorit.

Kështu, “sipas auditit të kryer nga SHSSH, për muajin prill, u konstatuan dy shkresa nga Këshilli Bashkiak Kamëz me të njëjtën datë dhe numër protokolli, (nr. 23, dt. 7.5.2013) nga të cilat në shkresën e para konstatohej se kishin aplikuar për ndihmë ekonomike 3400 familje dhe miratohej ndihma ekonomike po për kaq, ndërsa në shkresën tjetër me të njëjtën numër protokolli dhe datë me të parën, konstatohej se kishin aplikuar për ndihme ekonomike 5469 familje dhe miratohej përfitimi i ndihmës ekonomike për 5469 familje”, thuhet në njoftimin e SHSSH.

Gjithashtu kontrolli ka konstatuar se në një shkresë të firmosur nga kryebashkiaku Mziu, në të cilën bie në sy korrigjimi me dorë i numrit të aplikantëve.

“Gjatë kontrollit u konstatua gjithashtu shkresa me nr. Protokolli nr. 4, dt. 30.4.2013, e firmosur nga kryetari i Bashkisë Kamëz në të cilën konstatohet korrigjimi me dorë i numrit të aplikantëve në 5469 aplikues, dhe propozohej përfitimi i ndihmës ekonomike për 3400 familje”.

Ndër shkeljet e tjera të konstatuara janë edhe trajtimi me ndihmë ekonomike i 3103 familjeve në Bashkinë Kamëz, në kundërshtim me ligjin,  duke i shkaktuar një dëm ekonomik shtetit në vlerën 15 191 700 lekë vetëm për një muaj; miratimi nga Këshilli Bashkiak i fondeve të ndihmës ekonomike pa pasur fare listat e familjeve përfituese; tejkalimi i kompetencave ligjore nga ana e kryetarit të Bashkisë Kamëz, duke firmosur projekt-vendimet te ndihmës ekonomike në kundërshtim me Udhëzimin nr.383/3, datë 10.03.2006, Seksioni XI, pika 3; moskryerjen sipas legjislacionit të përllogaritjes së ndihmës ekonomike  e për rrjedhojë në shumë raste familje në kushte të ndryshme kanë marrë masë të njëjtë të ndihmës ekonomike. Në shumë raste është akorduar e njëjta masë ndihme si për familjen me 1 anëtar dhe për atë me 7-8 anëtarë. Në këto raste përveç dëmit ekonomik të shkaktuar, ka edhe trajtim të pabarabartë të shtetasve. Në muajin prill e maj në borderotë e pagesës së ndihmës ekonomike mungojnë numrat e llogarisë ku paguhet ndihma ekonomike, respektivisht për 783 familje dhe 1179 familje.

Ndihma ekonomike, zbulohen shkelje në Kamzë

Pak ditë më parë, emisioni “Fiks Fare” denoncoi abuzimet e ndodhura në Bashkinë e Kamzës me ndihmën ekonomike, ku persona me vila, biznese dhe makina ishin pjesë e skemës nga e cila përfitojnë ndihmë ekonomike në shkelje të ligjit.

Ministri i Mirëqenies Sociale dhe Rinisë, Erion Veliaj, tha se në përfundim të auditit, denoncimi do të bëhej në Prokurori.

“Kjo është e papranueshme. Në fillim të javës tjetër, do të kemi një megadenoncim në Prokurori, edhe si përgjigje ndaj investigimit të Fiks Fare, por edhe të auditit që ka gjetur mijëra abuzime në Kamëz. Ajo që është vënë re është se gjatë periudhës para zgjedhore, në muajin maj, është rritur lista e përfituesve të ndihmës ekonomike me disa mijëra. Pothuajse gjysma e abuzimit që ka ndodhur në fushatë në të gjithë Shqipërinë, ka ndodhur në Bashkinë e Kamzës. Ata që e kanë bërë këtë duhet të përgjigjen para drejtësisë”, ka thënë Veliaj.