Z.Rama, mos firmosni!

Një popull i tërë i ka sytë tek qeveria Rama. Një popull i tërë ndjek çdo hap që kjo qeveri po hedh në hapat e saj të para në rindërtimin e një vëndi keq të gjymtuar dhe keq të vjedhur e gjakosur nga regjimi shkatërrues berishian. Një popull i tërë vuri shpresat në votën që lëshoi në kutitë e votimeve në 23 Qershor. Në atë votë ishte dëshira e fortë dhe e zjarrtë për moskthim mbrapa. Në atë copë letër njerëzit shprehën dëshirën e fortë të realizimit të ëndrrës së tyre 23 vjeçare për ta parë Shqipërinë “nji zojë me kryet mbi hi” e me këmbë në gjelbërim. Në atë votë shqiptarët thanë: “Jo më në kurriz tonë!”, “Jo më thika në zemër të Shqipërisë!”, “Jo më marrëveshje vasale që e bëjnë Shqipërinë “kosh plehrash për të huajt!”, “Duam dinjitet!”, “Duam Mirëqënie!”, “Duam të ecim me hapin e Europës!” Në atë votë populli shqiptar shprehu dëshira të thëna e të pathëna për një jetë më të mirë, për ta, për nipërit e mbesat e tyre, dhe gjithë brezat që do të vinë më pas. Dhe populli shqiptar dëshiron që këto aspirata që lëshoi brenda kutisë së votimit të plotësohen katërcipërisht, dhe ndjek me vëmëndje, me drithërim çdo akt që qeveria Rama merr, çdo emërim që qeveria Rama zyrtarizon sepse dëshiron që shpresat e shprehura në atë votë të reflektohen në veprimet e qeverisë shqiptare. Dhe duket në disa nivele se po bëhen disa gjëra që shprehin disi këto aspirata të shprehura në votën e 23 Qershorit.

Dhe papritur shqipëtarët lexojnë nëpër gazeta pjesëza të një fjale që z.Rama që ka mbajtur në një mbledhje të Ministrisë së Mbrojtjes më 11 Nëntor, deklarime që i kujtojnë një rregjim që ata sapo e hodhën poshtë me votën e tyre dinjitoze.

“E ndjej për detyrë të lartë që nga ky shesh të nënvizoj se liria, paqja e siguria që kemi si një vend i NATO-s nuk janë të mira natyrore e as të dhëna njëherë e përgjithmonë. Ato qëndrojnë falë shërbimit dinjitoz të ushtarakëve që i shërbejnë paqes jo vetëm brenda vendit, por edhe në fronte të ashpra. Populli u ka borxh mirënjohjen, ndërkohë që qeveria u ka borxh vëmendjen dhe mbështetjen më të plotë”- është shprehur z.Rama.

 “Ne i japim rëndësi partneritetit me SHBA. Falë SHBA, sot shqiptarët janë më mirë se kurrë kudo ku banojnë në rajonin tonë, por qeveria i jep rëndësi të posaçme edhe çuarjes përpara me shpejtësi dhe efikasitet reformës së gjithanshme të FA, ristrukturimin organizativ, sistemin e edukimit, realizimin cilësor të detyrimeve tona”- ka vazhduar ai.

Këto dy paragrafe të shkëputura nga fjalimi i z.Rama tingëllojnë keq në shpirtin shqiptar, se i duket sikur dëgjojnë të njëjtin avaz të vjetër dhe i jehojnë keq në kokë shqiptarëve dhe e turbullojnë rëndë shpirtin e tyre. Ato duken sikur janë dhënë si përgjigje për kritikat që po bëhen në Shqipëri nga të gjitha anët në lidhje me importimin e kimikateve nga Siria në Shqipëri. I bën shqiptarët të ndjehen të pashpresë për të ardhmen e tyre, ndërsa ata zgjodhën para pak muajsh një qeveri që duhet të shikonte interesat e tyre dhe jo të të huajve.

Një specialist amerikan, Dan Kaszeta*, shkruan në Bloomberg.com në lidhje me kimikatet e Sirisë se ka vështirësi dhe rrezikshmëri të madhe në transportimin e një sasie kaq të madhe kimikatesh prej 1000 tonësh. E vetmja herë që është bërë një gjë e tillë thekson ai ka qënë kur SHBA, “Në operacionin Steel Box in 1990, lëvizi në një territor amerikan, në ishullin Johnston Atoll, në jug të Paqësorit nga Gjermania perëndimore një sasi shumë më të madhe se kjo që është gjetur në Siri, dhe u bë me sukses”.

Ai gjithashtu shkruan se “Turqia mund të kundërshtojë kalimin e këtyre kimikateve nëpërmjet Dardanelleve anash Stambollit. Danimarka dhe Suedia nuk do ta lejonin një gjë të tillë nëpërmjet Balltikut.”

Pastaj ai jep si mundësi për shkatërrimin e këtyre kimikateve Shqipërinë si varianti më i mundshëm duke ditur mentalitetin vasal të qeverive shqipëtare si dhe faktin që qenka një impiant në Qafmollë me kapacitet djegje 16 ton i ndërtuar nga Amerikanët. “Kjo e bën Shqipërinë mundësinë më pak të keqe për asgjësimin e armëve kimike Siriane.” Shprehet ai dhe thekson, “Mund të marrë vite të tëra për një impiant me kapacitet 16 ton djegie të agjentëve kimikalë (si i Qafmollës. Shënim i autores), të shkatërrojë 1000 ton.”

Po të bësh analizën dhe matematikën e kësaj ekspertize, të lindin pyetje të shumta.

E para: Përse qeveria Amerikane nuk bën transportimin e këtyre kimikateve përsëri në të njëjtin vend si në rastin e Gjermanisë? (llogjikisht është më i sigurtë transportimi i kimikateve përgjatë një vije ujore larg qëndrave të banuara dhe shkatërrimi i tyre në një ishull të largët, dhe natyrisht kushton shumë më shtrenjtë se po te bëhet në Shqipëri. Por a është fati i popujve më i rëndësishëm se paratë?)

E dyta: A e ka llogaritur qeveria Amerikane sa vite do t’i duhet impiantit të Qafmollës të shkatërrojë në mënyrë të sigurtë këto kimikate? (n.q.s supozojmë që 16 ton digjen për një vit, duhen 62 vjetë e më shumë për të djegur 1000 ton, po të jëtë gjysëm viti, do të duhen 32 vjet për këto kimikate të mbeten në ambientin shqiptar në pritje)

E treta: Ku do të depozitohen ndërkohë që këto kimikate prej 1000 tonësh që do të “presin” të shkatërrohen? Si do ta efektojnë ambientin dhe jetën e njerëzve dhe gjallesave gjatë këtyre viteve të gjatë këto kimikate?

E katërta: Kur të gjithë po kundërshtojnë edhe kalimin ujor në afërsi të territoreve të tyre, të këtyre kimikateve, përse ne duhet të lejojmë që këto armë kimike të rrezikëshme të kalojnë në tokën shqiptare dhe të depozitohen per vite të tëra në Shqipëri për t’u shkatërruar aty?

E pesta: Si ndjehen shqiptarët kur lexojnë se si shprehet Dan Kaszeta, “N.q.s. këto kimikate transportohen nga Siria në mënyrë të sigurtë, do të ketë akoma pengesa që do të përballohen në Shqipëri. Është një vend i varfër. Bota duhet të paguajë një çmim të lartë për të përmbushur këtë detyrë. Siguria dhe korrupsioni janë një problem atje. Shqipëria është një qendër kontrabande dhe krimi të organizuar?” Dhe rrjedhimisht ju lind pyetja: Përse qeveria Amerikane rrezikon të bjerë kimikate të tilla të rrezikshme në një vend të tillë, në të cilin mendon se ekziston kaosi dhe kriminaliteti dhe ato armë kimike mund të bien në duar të pasigurta?

Zoti Rama, në përgjigje të deklaratave të tuaja të mësipërme, shqiptarët kanë të drejtë të thonë: Ju nuk punoni për qeverinë e Shteteve të Bashkuara të Amerikë. Ju nuk i keni asnjë borxh qeverisë amerikane apo NATO-s kur vjen puna për një problem të tillë. Ju jeni zgjedhur nga populli shqiptar të plotësoni shpresat dhe kërkesat e këtij populli dhe jo të kërkesave absurde Amerikane apo të kujtdo qoftë. N.q.s. Amerika dhe Europa na kanë ndihmuar, e kanë bërë për hir të zhvillimit të proçeseve demokratike në Shqipëri dhe jo të na kthejnë në në një vend vasal dhe kazan mbeturinash ku të shprazin plehrat e botës pa asnjë përfillje për popullin shqipëtar, si dhe sigurinë dhe ardhmërinë e tij.

I vetmi detyrim që ju keni zoti Rama, është ndaj Shqipërisë dhe shqiptarëve dhe askujt tjetër! Ne shqiptarët ju prumë në pushtet! I thoni jo zbarkimit të lëndëve kimike në Shqipëri për të mbrojtur shëndetin e qytetarëve tuaj, dinjitetin e kombit shqiptar, si dhe dhe ardhmërinë e Ambientit dhe të ekologjisë Shqipëtare!

*Referencë: http://www.bloomberg.com/news/2013-11-10/send-syria-s-chemical-arms-to-albania.html

** Dan Kaszeta është një ish-oficer në ushtrinë e SHBA Trupave Kimike dhe ish-anëtar i Shërbimit Sekret të SHBA. Tani është duke punuar si konsulent i pavarur. Ai ka një përvojë 22 vjeçare në fushën e mbrojtjes kimike.