Ndihmëssekretarja e DASH në Tiranë, takon Nishanin

Ndihmës/Sekretarja e SHBA-së për çështjet e Europës dhe Euro Azisë, Viktoria Nuland ka ardhur sot në Tiranë për t’u takuar me krerët e shtetit dhe Qeverisë shqiptare.

Në orën 16:00 ajo është pritur në takim nga Presidenti i Republikës, Bujar Nishani, në selinë e Presidencës.

Takimet më pas do të vijojnë me kreun e Kuvendit Ilir Meta në orën 17:00, me kreun e opozitës Lulzim Basha në 17:30, për ta përmbyllur me shefin e qeverisë Edi Rama në 18:00.

Vizita e saj përfshin çështje të ndryshme dypalëshe dhe rajonale, duke përfshirë dhe integrimin euro-atlantik të vendit tonë në Bashkimin Europian.

Vizita e saj në vendin tonë do të bëhet në kuadër të një turi disa ditor në Ballkan e më gjerë.

Zyrtarja e DASH  do të vizitojë Kosovën dhe Serbinë në 13 korrik, ku do të diskutojë për dialogun mes dy vendeve dhe zbatimin e marrëveshjes së Brukselit

Ndalesa e parë do të jetë sot në Kroaci ku merr pjesë në Forumin e 9-të vjetorit të Kroacisë, ku do mbajë një fjalim edhe mbi Ballkanin perëndimor. Nuland do takohet me qeveritarë kroatë dhe liderë të rajonit që do jenë në konferencën për sigurinë rajonale e energjinë.

Në kuadër të takimeve, përfshihen vizita në Maqedoni, Serbi, Belgjikë dhe Britaninë e Madhe.

Sakaq, në 14 korrik, Nuland do të udhëtojë drejt Shkupit, ku do të takohet me zyrtarë të lartë qeveritarë dhe krerët e partive. Takimet përfshijnë diskutimin për rrugën euro-atlantike të vendit dhe për çështje të tjera me interes të përbashkët.

Zyrtarja e DASH, Nuland më pas do të vijojë vizitën në Londër, për t’u takuar me zyrtarët e lartë të qeverisë britanike ku do të diskutojë për çështjet globale dhe përgatitjet për Samitin e NATO, për ngjarjet e fundit në Ukrainë. / ORA