Ndryshime në qeveri? Vasili: Kush s’ka performancë të lëvizë

Kreu i grupit parlamentar të Lëvizjes Socialiste për Integrim, Petrit Vasili deklaron se ndryshimet e mundshme në qeveri janë atribut dhe përgjegjësi e Kryeministrit Edi Rama.

Vasili thekson se ndryshimet në qeveri nuk kanë të bëjnë me kartat elektorale.

“Kur dikujt i mungon impenjimi, nuk ka moment elektoral, por patjetër duhet të lëvizë. Ndryshimin e njerëzve nuk e kemi parë në funksion të ditës apo çështjeve elektorale, por në frymën e përgjegjësisë ndaj detyrës. Nuk ka një ditë të caktuar ku mund të bëhen ndryshime dhe një ditë ku nuk mund të bëhen ndryshime. Kjo është një dinamikë që vlerësohet vetëm nga performanca”, tha Vasili për Ora News.

I pyetur për marrëdhëniet mes PS-së dhe LSI-së, Vasili deklaron se nuk ka pasur ngërç midis këtyre dy forcave politike, por koherencë.

 “Mund të konfirmoj që vazhdojmë të kemi të njëjtën përgjegjshmëri për reformën, kurse ngërçin s’e kam parë gjëkundi, por është një atribut i mediave që po jua lë juve të medias ta administroni. Ne nuk kemi pasur ngërç por koherencë dhe vazhdojmë të kemi koherencë. Por po e them me një dozë shakaje se sikur verës po i vjen fundi dhe telenovela për ngërçin i erdhi fundi”, tha ai.

Vasili thotë se koha në dispozicion deri më 30 gusht për të miratuar ligjin për rivlerësimin e gjyqtarëve është e mjaftueshme për të afruar qëndrimet

 “Me vullnet të mirë mund të arrihet një miratim konsensual i ligjit. Dhe ky vullneti i mirë duhet të mbizotërojë edhe për 7 ligjet e Reformës”, u shpreh kreu i grupit parlamentar të LSI-së.