Në hetim 200 farmaci të tjera për skandalin me rimbursimin e barnave

Hetimet për skandalin e barnave, ku me anën e rimbursimit të tyre i është shkaktuar shtetit një dëm prej gjysmë milionë euro, do të shtrihen edhe ndaj dhjetëra farmacive të tjera.

Njësia Antikorrupsion në qeveri ka gati një tjetër material voluminoz për organin e akuzës, ku janë verifikuar rreth 200 farmaci të tjera, për të cilat ka dyshime se përdornin të njëjtën skemë, ku dëmi mund të jetë miliona euro, raporton gazeta Shqip.

Njësia Task-Forcë thotë se fillimisht po dokumenton rastet në fjalë, ku disa persona u ndaluan, apo janë me masë sigurie, dhe më pas do t’i drejtohet Antikorrupsionit, për të parë të gjitha verifikimet.

Akuza thotë se kërkon bashkëpunim nga të gjitha institucionet, pasi “gropa” që i është shkaktuar shtetit mund të jetë e njëjtë me atë të rimbursimit të TVSH (Tatimit mbi Vlerën e Shtuar) nga qindra firma skrapi, që përfituan mbi 50 milionë euro vetëm gjatë vitit 2013.

Në atë rast, shumë pak persona janë ndaluar apo proceduar, por edhe personat e marrë të pandehur, kanë marrë dënime qesharake nga gjykata, apo janë shpallur të pafajshëm.

Burimet nga organi i akuzës pohojnë se hetimet do të shtrohen edhe ndaj rasteve të tjera, ndërsa deri më tani mësohet se në “sitën” e hetuesve do të jenë të paktën 200 farmaci, që ushtrojnë aktivitet kryesisht në Tiranë, por edhe disa në rrethe.

Ndërkohë, për të mësuar më shumë mbi këtë aktivitet, prokurorët kanë “vizituar” në qeli pikërisht drejtorin e këtij institucioni, Pjerin Xhuvanin.

Në praninë e avokatit mbrojtës, ai nuk ka preferuar të flasë, ndërsa u ka thënë se do të shprehet në një fazë tjetër.