“S’është e thjeshtë të ecësh me forcat tua”

Deputeja e Partisë Demokratike, Mesila Doda, gjatë një interviste në media,  ditën e djeshme, ka rrëfyer në vija të përgjithshme, sakrificat që ka hasur për t’u bërë pjesë e politikës. Ndër të tjera, Doda thotë: “Politika, jo vetëm në Shqipëri, por kudo në Europë ka qenë një terren i burrave. Ka vende edhe nëpër botë që e kanë marrë shumë vonë të drejtën e votës së gruas. Sot, gjithnjë e më shumë gratë po fitojnë hapësirën që duhet të kishin. Besoj se ky shekull do të jetë shekulli i drejtësisë për gruan. Ne duhet të jemi qenie të barabarta në dinjitet me burrat, pasi edhe kemi lindur si të barabartë. Për mua personalisht ka qenë shumë e vështirë. Ka qenë e vështirë sepse në politikë nuk është e thjeshtë të ecësh me forcat e tua, me mendimet e tua, të jesh edhe anti-konformiste shumë herë. Ndonjëherë rrugën ta bëjnë edhe të përpjetë, të vështirë sepse jo pak herë një femër në politikë është përballur me paragjykime. Kam qenë një e re që kam mbajtur mbi supe një grua që ka mendimet e veta dhe që nuk dëshiron të bëhet skllave e kurrkujt në politikë. Kjo është e vështirë për këdo besoj. Por, në fund fare unë mund të them se betejave nuk u jam shmangur dhe jam përpjekur me çdo kusht që t’i shkoj deri në fund. Dhe fitore të tilla të shijojnë edhe më shumë pasi janë frut i përpjekjeve të përditshme e të vazhdueshme”. Ka qenë e qartë Mesila, në rrugën e saj…