Në Shqipëri nuk ka pasur luftë civile

Letër e nënshkruar

Skënder Dusha

Kohët e fundit në media, sidomos në atë të shkruarën po i mëshohet shumë tezës se Lufta Nacional Çlirimtare nuk ka qenë e tillë, por ka qenë luftë civile. Kjo nuk është aspak e vërtetë. Lufta civile ka ekzistuar në kohën e ballistëve, legalistëve, kolaboracionistëve dhe përkrahësve të tyre, të cilët e mbyllën me turp epopenë e Luftës së Dytë Botërore, nga e cila Shqipëria doli me nder.

Zotërinjtë ballistë dhe të tjerët kujtojnë se me këto britma do të mund të fitojnë diçka, bile duan të heqin dhe Ditën e Dëshmorëve, të cilën e ka vendosur fitimtari, ai që ka të drejtën legjitime të vendosë edhe kur do të festohet dita e çlirimit.

Para disa ditësh pashë në media shkrimin e këlyshit të një ish-komunisti, i cili sipas budallallëkut të tij, kishte llogaritur që dëshmorët e Luftës Nacional Çlirimtare nuk janë as sa një e dhjeta e atyre që janë shpallur. Unë, që e kam jetuar atë epope, po u them këtyre se janë shumë më tepër dhe dua të përsëris thënien e famshme të të madhit Vaclav Havel,  se “s’ka më të ndyrë se komunisti antikomunist”. Unë do të shtoja se këtyre njerëzve të ndyrë u janë bashkuar edhe shumë këlyshë të tjerë, të cilët për fatin tonë të keq, janë shumë.

E pyetën njëherë filozofin e lashtë Sokratin: kush është i mençur? Ai u përgjigj: ai që s’pengohet dy herë në të njëjtin vend. Këtë e përmenda për pinjollët e atyre mijëra mercenarëve, që në kohën kur u ngrit i gjithë populli shqiptar në luftën kundër pushtuesve, ata iu kundërvunë kësaj lufte dhe këta akoma nuk po e kuptojnë këtë krim që bënë paraardhësit e tyre.