Ministri mbledh krerët e policisë: Ngjarjet kriminale janë shtuar prej sezonit të suksesshëm turistik

Ministri i Brendshëm, Sandër Lleshaj, zhvilloi një takim me drejtuesit kryesorë të Policisë së Shtetit të nivelit qendror dhe vendor, teksa këta të fundit kanë raportuar për gjendjen e sigurisë dhe të rendit publik në vend, referuar ngjarjeve të fundit kriminale të ndodhura në vend – njofton Ministria.

Sipas saj, në fjalën e tij, ministri Lleshaj u ndal në mënyrë të veçantë tek nevoja e intensifikimit të punës së drejtuesve dhe strukturave të PSH kundër veprimtarisë së rëndë kriminale në vend.

Lleshaj tha se “sezoni i suksesshëm turistik ka sjellë si rezultat që Shqipëria të ketë aktualisht rreth dy herë më shumë banorë sesa në ditët e zakonshme të vitit dhe sipas tij bashkë me rritjen e jashtëzakonshme të numrit të përgjithshëm të njerëzve në vend, janë rritur shumë edhe sfidat dhe problemet me të cilat duhet të merret Policia e Shtetit, e cila është po ajo”.

Ministri i Brendshëm e vlerësoi faktin që drejtuesit e PSH dhe strukturat e saj janë në krye të detyrës, edhe në kulmin e sezonit të pushimeve në vend si dhe kërkoi që ky ritëm intensiv pune të vazhdojë me seriozitet edhe në ditët në vijim, – thotë njoftimi i Ministrisë.

b.b/dita