Nis takimi i Kretës: A do diskutohen temat tabu?

Në ishullin e Kretës nisi sot rreth orës 10 takimi i dy ministrave të Jashtëm të Shqipërisë dhe Greqisë, bisedime që synojnë të zgjidhin problemet më të mëdha mes dy vendeve.

Në takim do të diskutohen çështje që janë miratuar paraprakisht prej dy Ministrive të Jashtme ku renditen probleme teknike, të cilat ndikojnë në jetën e përditshme të qytetarëve të të dy vendeve, siç është pulla apostile, çështja e patentave, apo teksteve shkollore.

Në Athinë e dinë shumë mirë se dy çështjet kryesore në axhendën e palës shqiptare është heqja e ligjit të luftës dhe reduktimi ose heqja e tarifës konsullore për çdo dokument që merr çdo shtetas shqiptar ose emigrant në Greqi.

Do të diskutohet për një marrëveshje të re për çështjen e detit, çështjen e varrezave të të rënëve grekë në Luftën e Dytë Botërore, traktatin e ri të miqësisë mes dy vendeve, por edhe probleme të bartura historike, siç janë ligji i luftës apo problemet e pronave në të dy anët e kufirit.

Ndërkohë që nuk ka njoftim nëse palët do të diskutojnë për temat e ashtuquajtura tabu për palët, siç është çështja çame apo kërkesa greke për zgjerimin e zonave minoritare në Shqipëri.