Nishani dekorohet nga Forumi Crans Montana

Presidenti Bujar Nishani u dekorua nga Forumi Crans Montana në një ceremoni të veçantë me Çmimin e Fondacionit për vitin 2016. Dorëzimi i çmimit u bë nga Presidenti i Nderit dhe themelues i Forumit, Ambasadori Jean-Paul Carteron, i cili vlerësoi progresin e madh të kryer nga Shqipëria për kalimin nga diktatura në demokraci, anëtarësimin në NATO, si dhe afrimin gjithnjë e më shumë me Bashkimin Evropian. Gjithashtu, Ambasadori Carteron vlerësoi edhe kontributin personal të Presidentit Nishani në këtë drejtim.

Në fjalën e falënderimit, kreu i shtetit u shpreh se ky çmim është një vlerësim i madh e shumë domethënës për vendin dhe bashkudhëtarët tij kudo ndodhen dhe vjen në një moment kyç për Shqipërinë dhe rajonin e Ballkanit Perëndimor, që aktualisht po përjetojnë ankthin e humbjes së vëmendjes nga Bashkimi Europian.

Bujar Nishani, President i Shqipërisë: “Jam i sigurt që falë edhe kontributit të Forumit të Crans Montanas, kjo gjë nuk do të ndodhë dhe Shqipëria dhe Ballkani Perëndimor do të kenë vëmendjen e nevojshme të Bashkimit Evropian për vijimin në rrugën e reformave dhe të përmbushjes së standardeve më të mira evropiane.”

Çmimi i “Fondacionit” i është akorduar liderëve të ndryshëm evropianë dhe botërorë në shenjë mirënjohje dhe vlerësimi për angazhimin publik në promovimin e vlerave demokratike dhe një botë më të mirë. Gjatë pjesëmarrjes në sesionin e 27-të vjetor të Forumit të Crans Montanas, Presidenti Nishani zhvilloi takime të shkurtra edhe me shtetarë, politikanë e përfaqësues të botës së biznesit që merrnin pjesë në këtë forum.