Presidenti Bujar Nishani përshëndeti nënshkrimin në Uashington të Deklaratës së Përbashkët për Partneritet Strategjik mes Republikës së Shqipërisë dhe Shteteve të Bashkuara të Amerikës dhe e konsideron atë një dokument shumë të rëndësishëm për forcimin e mëtejshëm të marrëdhënieve mes dy vendeve, intensifikimin e dialogut politik në të gjitha çështjet me interes strategjik si dhe një instrument inkurajues për paqen dhe sigurinë në rajonin e Ballkanit Perëndimor.
Nishani shprehu mirënjohjen e thellë për mbështetjen e gjithanshme që Shtetet e Bashkuara i kanë dhënë Shqipërisë ndër vite për vendosjen e përpjekjet për konsolidimin e demokracisë dhe shtetit ligjor, për realizimin e aspiratës sonë evropiane si dhe për forcimin e rolit konstruktiv dhe stabilizues që Shqipëria ka luajtur dhe vazhdon të ketë në Ballkanin Perëndimor.
Kreu i Shtetit vlerëson gjithashtu se Shqipëria dhe SHBA, si dy vende aleate në NATO, pas nënshkrimit të këtij dokumenti do të rrisin e forcojnë më shumë bashkëpunimin në fushën e mbrojtjes si në nivel dypalësh e rajonal, ashtu edhe në nivel global. Me mbështetjen e vazhdueshme dhe në partneritet me Shtetet e Bashkuara, Shqipëria do të vazhdojë të mbështesë misionet e ardhshme të NATO-s dhe të jetë kontribuese aktive për sigurinë globale.
Presidenti fton të gjithë institucionet shtetërore që në zbërthim të Planit të Zbatimit të Deklaratës së Partneritetit Strategjik me SHBA-të të bëjnë të gjitha përpjekjet për zbatimin e tij të plotë dhe energjik në dobi të thellimit të marrëdhënieve dypalëshe dhe të forcimit të sigurisë rajonale e globale.
Po për publikun do ta bëni të njohur çfarë përmban ky “Plani për zbatimin e deklaratës së Partneritetit Strategjik me ShBA”? Nuk duhet lajmi por plani për opinionin publik dhe për Sovranin! Tung!