Nisma ligjore, Bregu: Kush ushtron dhunë të mos punësohet në administratë

Nisur nga rastet e fundit të dhunës ndaj fëmijëve dhe në familje, tre deputete të Kuvendit të Shqipërisë kanë ndërmarrë një nismë ligjore e cila synon ndëshkim me humbje të vendit të punës dhe të së drejtës për t’u punësuar me administratë nëse ushtron dhunë.

Majlinda Bregu, Mesila Dodën dhe Albana Vokshi kërkojnë ndryshimin e ligjit të dekriminalizimit.

Sipas deputetes Bregu, punonjësit e administratës publike nëpërmjet formularit të vetëdeklarimit duhet të bëjnë të ditur nëse ata kanë pasur probleme me ligjin në këtë drejtim.

“E para do të ndalonte rikthimin në punë ose riciklimin e atyre personave që kanë pasur eksperienca dhune me fëmijët siç kanë ndodhur jo pak raste të tjera me shtëpitë e fëmijës në Shqipëri. E dyta do të vendoste një rregull për të pasur një filtrim të të gjithë atyre që do të merren dhe punojnë me fëmijët. E treta, është një mesazh shumë i fuqishëm: Kushdo që guxon të verë dorë mbi gruan, nënën, bashkëshorten, nënën e fëmijëve, fëmijët mbi të gjitha, nuk mund të jetë një njeri që do t’i besohet një detyrë publike”, theksoi Bregu.

Deputetja demokrate thekson se është mjaft e nevojshme ngritja e një komisioni vlerësimi për ata që merren më edukimin e fëmijëve si dhe forcimin e rolit të punonjësit social dhe psikologut në shkolla.

“E para ka nevojë për të bërë një lloj rishikimi dhe një lloj rivlerësimi të të gjithë atyre që punojnë dhe merren me fëmijët, duke nisur nga edukatoret e çerdheve, të kopshteve dhe mësuesit nëpër shkolla. E dyta për të shtuar dhe për të forcuar rolin e punonjësit social apo psikologut në shkolla duke u dhënë atyre një manual të plotë sesi ata duhet të raportojnë, të bëjnë vlerësimin e mësuesve, jo vetëm të nxënësve. Njëkohësisht edhe pjesën e vlerësimit të nxënësve, por edhe të raportojnë në rast se kanë vënë re episode të shfaqjes së dhunës e cila, jo gjithmonë është e hapur”, tha Bregu për Ora News.

Deputetja Bregu thekson se deri më tani ideja e tyre mbetet në kuadrin e një nisme dhe ende nuk është vendosur se kur do të depozitohet në kuvend.