Një dosje mashtrimi në prokurori për Greta Koçin?

Në muajin Shtator 2013, një emigrant shqiptar në Angli u paraqit në prokurori në Tiranë dhe bëri një kallëzim të çuditshëm. Një femër misterioze që e kishte njohur në “Facebook” në harkun e 3 viteve kishte arritur t’i zhvaste rreth 60 mijë paund vetëm me biseda në internet dhe biseda në telefon, pa u shfaqur kurrë me fytyrë, pa u takuar asnjëherë. Fabula dhe itinerari tre vjeçar i kontakteve mes tyre kuptohet lehtësisht në kallëzimin që ky shtetas ka bërë dhe që DITA e boton sot të plotë. Nga ana tjetër fabula dhe dokumentet e dosjes tregojnë se emigranti denoncues ka mbledhur të gjitha faturat e dërgesave të parave në 3 vite dhe rezulton se personi që i ka pritur këto dërgesa në Shqipëri është shtetasi Verjan Hysaj. Ai është shoferi i këngëtares Greta Koçi, e cila në periudhën kur është bërë ky kallëzim penal ishte punonjëse e ministrisë së Brendshme. Vetë shoferi i Greta Koçit ka ngritur padi penale ndaj saj, disa muaj më parë. Pasi nisi të kuptonte kurthin, emigranti erdhi vetë në Shqipëri, e takoi dhe shoferin e këngëtares Greta Koçi që kishte bërë tërheqjen e lekëve në pikat e dërgimit. Por ai i tha se kodet e dërgesave ia kishte dhënë një shtetas që korrespondonte me xhaxhanë e këngëtares. Por duket se gjithçka ka qenë një labirint mashtrimi me kosto 60 mijë euro për emigrantin. Në disa biseda të regjistruara elektronike që ai ka zhvilluar me shoferin e Greta Koçit, rezulton se ky i fundit i ka pranuar se gjithçka ishte një mashtrim i organizuar duke u shprehur qartësisht se ishte e gjithë ‘familja’ në skemë e përfshirë. Këto komunikime DITA do i botojë numrin e ardhshëm të plota. Aktualisht kjo dosje hetimore është e pezulluar në prokurori, ndërsa disa nga komunikimet dhe dokumentet e paraqitura nga denoncuesi nuk janë pranuar nga organi i akuzës. Është kjo arsyeja që denoncuesi ka referuar të gjithë dokumentacionin pranë gazetës DITA, duke synuar hetimin e kësaj skeme mashtrimi që atij i ka kushtuar rreth 60 mijë paund.

 ***

Kallëzimi i bërë në prokurori nga shtetasi B.H

PROCES -VERBAL Per kallëzimin e veprës penale.

Në Tiranë, viti 2013, muaj Shtator , data 03.

Unë F.Shahinaj , me detyrë Oficer i Policisë Gjyqësore në Drejtorinë e Policisë Qarkut-Tiranë, pranë Seksionit Kundër Krimit Ekonomiko-Financiar, në baze të nenit 283 të K.Procedurës Penale,mbaj këtë proces-verbal për kallëzimin me gojë të veprës penale nga shtetasi B.H i biri i Aqifit dhe i Servetes i datëlindjes 17.04.1976, lindur Elbasan dhe banues në Komunën Papër fshati Valas Elbasan , me arsim të mesëm, i pa martuar i pa dënuar , me shtetësi dhe kombësi shqiptare, me nr.tel 06825… dhe 003938…., i cili u identifikua me kartën e identitetit nr ID 0322….

Kallzuesit ju shpjegua përgjegjësia penale në rast të kallëzimit të rremë sipas nenit 305 të K.Penal.

Me vullnetin e lirë të tij kallëzuesi deklaron si më poshtë vijon:

KALLZIM

Unë prej një periudhe 14 vjeçare banoj dhe jetoj në shtetin Anglez. Kallëzimi im konsiston në faktin se në vitin 2009 në muajin Korrik nëpërmjet internetit kam komunikuar me një shtetase e cila me është prezantuar me emrin Anjeza Hysaj shkurt Ani. Gjatë komunikimit në internet më pati thënë se ishte nga qyteti i Durrësit, ishte jetime dhe më ka dhënë vitin e lindjes 1988 dhe se jetonte me babanë e vetë ku me pati thënë dhe emrin e tije që quhej R.Hysaj. Ky komunikim ka vazhduar për një periudhe 2 mujore dhe me pas nga ana e saj duke më qarë hallin për problemet nga më të ndryshmet herë pas here më kërkonte që une t’i dërgoja lekë me kompanitë qe operojnë në këtë fushë “Uester Union” dhe “Many Gram”. Unë në mënyrën si ajo komunikonte krijova një farë besimi dhe keqardhje njëkohësisht dhe fillova ta ndihmoja me shuma lekësh të cilat varionin 50 Paund deri në 2000 paund. Dërgesat nga na ime kane filluar në muajin Shtator të vitit 2009 deri në muajin Dhjetor të vitit 2011. Dua të them se gjashte mujorin e fundit të kohës kur kryeja dërgesa dyshova tek kjo shtetase dhe i kam bërë dërgesa më të vogla me qëllim që të investigoja kush ishte ky person. Dua te deklaroj se shtetasja që më është prezantuar me këtë emër pra Anjeza Hysaj më ka rekomanduar mua që dërgesat t’i kryeja në emër të shtetasit Verian Hysaj i cili sipas thënieve të saj ishte djali i xhaxhait të saj. Arsyeja e dërgimit në këtë emër ishte (sipas saj) pasi ajo nuk dispononte pasaportë për të kryer veprimet. Me këtë shtetase unë pas komunikimit në internet kam komunikuar në telefon celular. Nga ana e saj për komunikim me mua janë përdorur këta numra telefoni : 06955…., 06947…. dhe 06951…. Këta numra telefoni janë përdorur nga muaji Shtator 2009 deri në Qershor 2011. Me pas shtetasja e prezantuar si Anjeza Hysaj është larguar për në Spanjë dhe ka komunikuar me mua në dy numra telefoni të cilat janë 00346987….dhe 00346900….. Gjate komunikimeve që bënte me mua me numrat spanjoll ajo me porosiste mua që dërgesat që unë kryeja në emër të shtetases me emrin Syrije Koçi dhe në një rast më ka thënë t’i dërgoj në emër të një shtetasi me emrin A.Kurti i cili ishte kushëriri i Verjanit sipas saj. Për Syrije Koçin më ka thënë që është maqedonse dhe që banonte tek shtëpia e saj . Ajo i merr lekët dhe mi jep mua. Pas gjithë këtyre dërgesave dhe komunikimeve unë në muajin Dhjetor 2011 kam komunikuar me këtë shtetase me emrin Anjeza Hysaj dhe i kam thënë se unë me ty do të takohem në gjykatë. Më pas unë kam ardhur ne Shqipëri dhe kam investiguar privatisht rreth emrave që kjo më kishte përmendur dhe kryesisht jam munduar të gjej kush ishte shtetasi Verjan Hysaj. Pas shumë mundimesh kam komunikuar me këtë shtetas dhe me pas kam pasur dhe kontakte fizike. E kam pyetur rreth personit që është paraqitur me emrin Anjeza Hysaj. Nga ana e tij më është thënë se këtë shtetase me këtë emër unë nuk e njoh por lekët që ishin dërguar nga ana ime ishin tërhequr nga ana e tij. Këto lekë ishin tërhequr pasi shtetasja që është paraqitur si Anjeza Hysaj i ka dhe kodin e dërgesës. Sipas Verjanit kodin e tërheqjes së lekëve ja ka dhënë shtetasi Skënder Koçi. Kur unë kam mësuar rreth emrit të shtetasit Skënder Koçi jam munduar të komunikoj me të dhe bashkëshorten e tij e cila quhej Syrrije Koçi por nuk kam mundur. Me pas unë në adresën e tij kam dërguar nje e-mail në lidhje me këtë çështje por nuk kam marrë asnjë përgjigje. Nga ana e djalit të tij i cili quhet Mondi Koçi më është dërguar një e-mail në Facebook ku më thotë se jo në gjyq të shkoni por në Hagë të shkoni s’të kemi asnjë lek borxh.

Pyetje : A keni komunikuar në ndonjë formë tjetër qe ju ta shihnit me figurë shtetasen Anjeza Hyskaj.

Pergjigje: Unë kam kërkuar një gjë të tillë por nga ana e saj më është thënë se kam kompjuterin e vjetër, nuk kam kamer të mirë e të tjera. Në një rast kam mundur ta shoh vetëm tre sekonda jo më shumë. Ka qenë vajzë e re në dukje me flokë të zeza.

Pyetje : Po me shtetasin Verjan Hysaj me çfarë numrash telefoni keni komunikuar?

Përgjigje :Unë me shtetasin Verjan Hysaj nuk kam komunikuar në telefon por me email. Në Janar kur e kam kontaktuar ai më ka dhënë mua numrat e telefonit të cilët sipas tij janë 067…., 06921…dhe përdoreshin nga shtetasi Skënder Koçi. Numrat 069…,069….dhe 06731….perdoreshin nga Verjani. Gjë tjetër nuk kam ç’të them për sa thashë më sipër janë të vërteta dhe pasi i lexova i firmos pa vërejtje.

(vijon nesër)