Një leksion ndihmës për Ristanin

Gjatë një interperlance në parlament, deputeti demokrat Arben Ristani denoncoi, sipas tij, një lloj krahinizmi që kishte përfshirë strukturat e larta drejtuese te Rendit, ku, që prej ministrit Sajmir Tahiri, të emëruarit në këto struktura i bashkonte origjina e njëjtë krahinore. Duke përmendur jo emra konkretë por poste, me një stil ligjërimi që afronte më shumë me aliteracionin, ai thoshte se filani është nga Tepelena e fisteku është nga Kurveleshi. Sa për t`i dhënë një dorë ndihmë Ristanit, i cili edhe pse deputet në jug,  duket se ka njohuri të mangëta rreth gjeografisë krahinore të vendit të tij, e sqarojmë se po the Tepelenë ke thënë njëherësh dhe Kurvelesh e anasjelltas. Siç ngjashëm po the myzeqar ke thënë dhe lushnjar; po the lab ke thënë dhe vlonjat; po the lumjan ke thënë dhe kuksian; po the dukagjins ke thënë dhe shkodran. Për të qenë më të saktë: këto treva vërtet indentifikohen me një rreth të caktuar, por nga pikëpamja administrative, duhet theksuar se Lumën vërtet e dominon Kukësi, po ka nga pak dhe Dibra si pjesë; Kurveleshi përfshin dhe ca fshatra të Gjirokastrës; Labëria përfshin dhe ca pak fshatra të Tepelenës e Delvinës duke u shkrirë me identitetin kurveleshas; e Myzeqeja përfshin dhe ca pak hapësira të Fierit. Ja pra, që të qënit “kokë e madhe” në çështje juridike, jo domosdoshmërisht ta jep këtë vlerë dhe në fusha të tjera.