Një letër për djalin e Zenel Islamit

Letër e nënshkruar

Rrok Likaj, Lezhë

Të nderuar drejtues të gazetës Dita! Edhe pse jam i moshuar, rreth 90 vjeç, me kënaqësi e lexoj gazetën Dita, e cila kritikon me shumë të drejtë duke goditur me fakte konkrete shkaktarët që sjellin pasojat.

Kam dëshirë t’i drejtohem zotit Bedri Islamit. I dashur Bedri! Nuk ju kam takuar që në moshën dy vjeçare, por duke lexuar shkrimet tuaja, mësova se jeni djali i shokut tim të luftës dhe të punës, të paharruarit Zenel Islami. Puka e ka dashur Zenelin si djalin e vetë, sepse Zeneli ka kontribut të veçantë për arsimimin e pukjanëve, si dhe përmirësimin e jetës së tyre. Çlirimi i Shqipërisë Pukën e gjeti thuajse tërësisht analfabet, me pak shkollë. Gjendja ekonomike ishte mjaft e vështirë, shtëpitë e fshatarëve ishin thuajse kasolle, edhe qyteti i Pukës ishte mjaft i pazhvilluar, i ndërtuar kryesisht me barake prej dërrase.

Për kontributin që ka dhënë Zenel Islami në zonën e Pukës, për asnjë arsye nuk duhet harruar. Zenel Islami, qe prej shume viteve, me miratim unanim te te gjithe keshilltareve, eshte shpallur qytetar nderi i Pukes, vendlindjes se tij.

I dashur Bedri, theksoj se prindërit tuaj kanë qenë njerëz të nderuar dhe nëna juaj i përket një familjeje të nderuar e të respektuar në mbarë Shkodrën dhe më tej, siç janë familja Gjylbegu, të mirënjohur në Shqipëri. Zoti Bedri, kemi respekt të veçantë për ju, sepse ashtu si edhe babai juaj, po i kontribuoni me patriotizëm, mençuri e vetëmohim çështjes së madhe kombëtare shqiptare. Shkrimet tuaja në gazetën Dita kanë bërë jehonë në mbarë popullin, sepse ju shkruani me realizëm, me vërtetësi. I dashuri Bedri, dëshira ime më e madhe është që të të takoj dhe të njihemi nga afër, të çmallemi me djalin e shokut tim të hershëm. Me shumë respekt, Rrok Likaj, Lezhë.