Program si “Le iene”, ikën edhe “Doktori”

Saimir Kodra na fton të qeshim me lot, me të gjitha ngjyrat e humorit të prodhuara nga ai, në programin më të ri në “Agon Channel”. Pas zhurmës së krijuar në publik dhe fiks-farekomenteve të shumta për arsyen e vërtetë të largimit nga “Fiks Fare” e “Top Channel” pas 12 vitesh, Saimiri jep këtë intervistë në media për të na sqaruar gjithçka në detaje. Nuk e mohon që paga e mirë e joshi, por edhe ambicia për të nisur diçka të re nga e para ishte arsye e fortë për të marrë këtë vendim. Në programin që pritet së shpejti, ku do të bëhet opozitë për këdo dhe gjithçka që nuk shkon mirë në këtë vend, shpesh do të prodhohet humor i zi dhe humor politik, që do i shkojë për shtat realitetit tonë. Saimiri zbulon të rejat dhe pritshmëritë ku njëra prej të cilave është edhe e ardhmja e ish kolegut të tij te Fiksi, Doktori. I pyetur rreth zërave që flasin për një largim të Gent Pjetrit nga “Top Channel”, Saimir Kodra është përgjigjur: “Genti? Aaaa Doktori… Doktorët në përgjithësi janë të pakuptueshëm, sidomos në recetat e tyre. Ofertat në “Agon Channel” i bën Bechetti. Ai di si të bëjë një të tillë, pra një ofertë të parezistueshme… E Doktori nuk është prej hekuri, oferta e “Agon Channel” e bëri që ta firmosë kontratën. Në fakt ishte një goxha ofertë, nuk mund t’i rezistonte”.