Një pyetje: A e njihni vlonjatin Agim Sulaj?!

Aq keq është gjendja, sa, po nuk të begenisi a të erdhi në “sebep” artistik politikani a politikania e një iks force politike, ti nuk vlen as si artist dhe as si shkrimtar a poet…

Në turbullirën e madhe që mbizotëron rëndom tërë këto vite pluralizmi apo kaosi të vlerave dhe antivlerave në vendin tonë, e ke të lehtë të kuptosh “terrorin” e madh të njerëzve të politikës, gjithfarëlloj njerëzve të medias të çfarëdo krahu qofshin, për të mbizotëruar ndaj publikut dhe opinionit të tij, por më keq ama ndaj “ikonave” dhe njerëzve vërtet të mëdhenj të artit dhe kulturës, shqiptarëve të talentuar dhe të sakrificave që japin kontributin e tyre artistik dhe letrar brenda dhe jashtë vendit. Aq keq është gjendja, sa, po nuk të begenisi a të erdhi në “sebep” artistik politikani a politikania(këta të fundit veç janë pjesëmarrës dhe fjalimmbajtës, dhe kur të japin ndonjë “gradë” dhe vlerësim, këtë e bëjnë gjithmonë për të përfituar politikisht nga të gjindurit e tyre në sebepin artistik të artistit apo shkrimtarit), e një iks force politike, ti nuk vlen as si artist dhe as si shkrimtar a poet. Shkencëtar jo e jo, se kërkohen ca kushte më të mëdha që të bësh shkencë këtu tek ne. Njerëzit e mëdhenj të artit dhe kulturës në atdheun tonë të dashur, duket se kanë ngelur si shqiptarë të dorës së dytë, që nëse nuk kanë “mëshirën” e politikanëve të krahut iks apo ypsilon për të trajtuar sadopak, dhe që përndryshe quhen pozitë-opozitë, mund të jenë edhe më keq po nuk patën të paktën dashurinë e ndopak njerëzve të medias, si pushtet medemek i katërt…

Përjashtuar nja dy-tre emisioneve televizive që flasin për art dhe kulturë në programet e televizioneve tona, je i detyruar të dëgjosh, që nga mëngjesi në mbrëmje, vetëm broçkullisje politike, a demek politike të gjithkujt e për gjithfarë në këto lëmenj të mëdhenj të abuzuar, keqtrajtuar dhe keqpërdorur. Por më e keqja është kur njerëz të medias dhe politikë, si moderatorë dhe politikanë japin mend dhe të ilustrojnë për fusha të artit dhe kulturës, dhe ç’lidhje kanë ato me politikën e tyre. Po kur na hidhet një mbrëmje politikani X e po na tregonte në një fragment të broçkullitjeve të tij politike gjithë pompozitet se ç’qe karikatura!…

“- Art është edhe karikatura…!” – u hodh dhe i bëri avokaturën karikaturës së gjorë dhe moderatorja e emisionit, sikur donte ta mëshironte në sytë e teleshikuesve…

Eshtë bërë zakon të flitet dhe të reklamohet në çfarëdolloj media, faqe kulture dhe emision për x personazh të shfaqjeve televizive dhe spektakleve, artist mediokër të muzikës, apo suksesmadhi të dyshimtë sportiv, sesa për një artist të vërtetë.. Ç’bën gjatë ditës, ç’ha, ç’pi,..ç’…!

Një pyetje: A e njihni Agim Sulajn?!..Piktorin dhe karikaturistin e madh vlonjat që korr suksese çdo muaj dhe vit anembanë ekspozitave dhe konkurseve më të famshme nëpër botë?!.. A e dini që janë me mijra njerëz dhe personalitete botërore të artit dhe kulturës që e njohin dhe vlerësojnë punën e tij artistike të tij si një nga majat e artit bashkëkohor botëror?!..Disa mundet dhe këtu tek ne e njohin dhe vlerësojnë, disa nuk munden se mbase iu ka zënë sytë mediokriteti i zullumqarëve të politikës dhe gjoja-artit dhe kulturës dhe protagonistëve që na shfaqet ditë natë nga tv-të dhe gazetat.

E pra Agim Sulaj, 53-vjeçar hesht vërtet për nga fjalët, përtej Adriatikut, aty ku jeton dhe punon prej mëse 20 vjetësh në Riminin e Italisë, por ndriçon dhe flet pa fund me artin e tij të madh. Fjalët për Agim Sulajn janë të tepërta: Flet vetë CV-ja e tij e artë që ndriçohet gjithmonë e më tepër me kalimin e muajve dhe viteve, dhe nja dy tre punë të tij që po I vendosim më bashkë me këto radhë modeste si shembull. Por ama, të shohim që titujt “Qytetar Nderi”, apo “Nder i Kombit”, ju takojnë edhe këtyre njerëzve me të vërtetë të mëdhenj, dhe jo vetëm atyre miqve të kulisave dhe këshilltarëve të funksionarëve të lartë, dhe të bashkive që ikin e vijnë konjukturalisht nëpër rotacione politike! Faleminderit Agim për artin tënd dhe që ndikon jo pak të ndihemi krenarë si shqiptarë! Paç sukseset dhe jetën e gjatë!… (Portreti shoqërues: Agim Sulaj nga Medi Belortaja)