Një shans i humbur për Kosovën-reagime të shumta në Prishtinë

Dështimi i Kosovës për t’u anëtarësuar në UNESCO, ka sjell reagime të shumta në Kosovës. Ambasadori amerikan në Prishtinë, Greg Delawie, e konsideroi zhgënjyes votimit në Konferencën e Përgjithshme të UNESCO-s.  “Vota e sotme në UNESCO ishte zhgënjyese, por 92 votat e fituara tregojnë se Kosova ka një vend të rëndësishëm në komunitetin ndërkombëtar”, ka thënë ambasadori amerikan.

Edhe Presidentja e Kosovës, Atifete Jahjaga e konsideroi një shans të humbur për avancimin e mëtejshëm. Sipas saj, “ky angazhim i ynë vetëm sa do të marrë hov e me këtë edhe përkushtimi ynë që ta mbrojmë dhe ruajmë trashëgimin kulturore e cila është trashëgimi botërore” , duke shtuar se “sot u bë e qartë që ne, që shteti ynë, gëzon përkrahjen e palëkundur të botës së lirë dhe demokratike”.

“Republika e Kosovës nuk do të dekurajohet nga ky veprim sepse ne dhe shumica e shteteve të botës, jemi të bindur në kauzën tonë dhe të pandalshëm në konsolidimin e shtetësisë tonë në arenën ndërkombëtare”, tha presidentja e Kosovës, Atifete Jahjaga, pasi Kosova nuk arriti të pranohet në UNESCO.

Kryeministri i Kosovës, Isa Mustafa, ka shprehur keqardhje të thellë për “mungesën e konsensusit ndërkombëtar për pranimin e Kosovës si anëtare me të drejta të plota në Organizatën e Kombeve të Bashkuara për Arsim, Shkencë e Kulturë (UNESCO), duke theksuar se Kosova nuk do të zmbrapset nga agjenda e saj evroatlantike dhe do t’i bindë të gjithë se meriton të bëhet pjesë e të gjitha organizatave ndërkombëtare”.

“Fatkeqësisht, orientimi i qartë properëndimor i Kosovës si dhe gatishmëria e saj për të çuar përpara të gjitha agjendat konstruktive, i ka penguar Serbisë, e cila ka ndërmarrë në vazhdimësi, por sidomos gjatë këtij procesi, një fushatë raciste kundër Kosovës. Kjo ka ndikuar tek disa shtete që ndajnë interesa të përbashkëta me aleatët e Serbisë. Por, kjo nuk na zmbraps aspak. Sepse ne jemi të vendosur të punojmë pareshtur për ta fuqizuar shtetin e Kosovës dhe për ta afirmuar atë si një projekt të suksesshëm, që u shërben interesave të qytetarëve të saj, pa asnjë dallim dhe që është kontribut i paqes, tolerancës dhe prosperitetit”, ka theksuar Mustafa.

“Rruga e Kosovës është e pandalshme dhe ne do të aplikojmë dhe do të anëtarësohemi edhe në organizata tjera, përfshirë UNESCO-n edhe një here”, tha ministri i Jashtëm i Kosovës, Hashim Thaçi.