“Një shtet mik do të na japë 360 mijë doza Astra Zeneca”, Rama nga Rinasi: Presim vetëm konfirmimin final, këtë javë do të nisë vaksinimi anti-COVID edhe te më të moshuarit

Kryeministri Rama, në një komunikim nga aeroporti “Nënë Tereza”, ka folur për vaksinën dhe ka bërë me dije se 360 mijë doza të Astra Zeneca do të mbërrijnë në Shqipëri.

Rama u shpreh se dozat e Astra Zeneca do të vijnë nga një shtet mik dhe do të fillojnë të lëvrohen në muajin prill.

Ai tha se këto doza ende nuk janë konfirmuar zyrtarisht nga vendi fqinj, por qeveria shqiptare vijon komunikimin në mënyrë që në ditët në vijim ajo të realizohet.

“Vazhdojmë me lëvrimin e një sasie tjetër nga Pfizer. Është e rëndësishme që të shpjegojmë ecurinë e kësaj situate sepse fillimisht mbërritën 1170 doza. Sot mbërrijnë 7020 doza dhe sipas skedulit të ri të dhënë nga kompania pas atij momenti bllokimi, vazhdojmë javët në vijim për të përmbyllur brenda marsit të gjithë dozat që kemi deklaruar fillimisht. Ajo që është e rëndësishme të shpjegohet për të kuptuar qytetarët që presin vaksinën është se ndërkohë ne jemi intensivisht në komunikim për të arritur një marrëveshje me AstraZenecan.

Përveç komunikimit të drejtëpërdrejtë, komunikimet po bëhet dhe me shtetet e tjera. Kemi marrë konfirmimin nga një shtet mik për 360 mijë doza të AstraZeneca-s. Nuk dua të konfirmoj asgjë përderisa nuk kemi vulosur marrëveshjen, pasi në një situatë si kjo, çdo fjalë mund të duket si propagandë. Konfirmimi është si rezultat i një komunikimi intensiv dhe shpresoj që në ditët në vijim të kemi një kontakt të drejtëpërdrejtë me qeverinë e këtij shteti dhe aty gjithçka të jetë publike”– tha Rama.

Gjithashtu, gjatë pritjes së dozave të reja të vaksinës së Pfizer në Rinas, kryeministri deklaroi se po këtë javë përveç bluzave të bardha, do të nisë vaksinimi edhe te më të moshuarit.

“Me ardhjen e këtyre dozave sot dhe me pasjen e një qartësie për ato 40 mijë doza që janë konfirmuar, ne do fillojmë shtrirjen e vaksinimit gjatë kësaj jave në Vlorë dhe në Shkodër, dhe po ashtu hap pas hapi, në varësi nga kalendari i ministres, edhe në Elbasan, Fier. Paralelisht me vaksinimin e mjekëve dhe bluzave të bardha, do të bëjmë edhe fillimin e vaksinimit të më të moshuarve. Kemi të gjitha arsyet të jemi të bindur se ne mund ta realizojmë objektivin e vaksinimit të plotë për 14 muaj. Është vetëm çështje konfirmimi të sasive dhe disponimi të sasive.”– u shpreh Rama.

h.b/dita