Një vit pa Sokolin, e ëma e Olldashit, Kozeta Mamaqi, nuk fton Berishën dhe Bashën

Erion HABILAJ

Po bëhet një vit nga vdekja e Sokol Olldashit. Ishte muaji nëntor i vitit të kaluar. Data 20. Një natë e ftohtë me shi mori me vete jetën e deputetit të opozitës. Kujtojmë se raportimet e para që erdhën nga televizionet informative ishin kontradiktore, si në emra, ashtu edhe me gjendjen e të aksidentuarit.

Megjithatë, në fund u mësua se ish-ministri Sokol Olldashi humbi jetën në një aksident tragjik, në Qafën e Kërrabës, rrugës duke u kthyer për në Tiranë nga qyteti i Elbasanit.

Aksidenti i tij është i mbushur me mistere, sot e kësaj dite, edhe pse dosja hetimore u mbyll, përsëri kanë mbetur hije dyshimi. Vdekja e Olldashit, për të cilën vazhdojnë e hidhen dyshime, sidomos në rrjetet sociale, ishte goditje e rëndë për bashkëshorten, fëmijët, vëllanë Ardin.

Por kur vjen puna te nëna, përballimi i humbjes bëhet më i vështirë. Miqtë e saj thonë se ajo e ka treguar me 17 vitet e kaluara në internim se është një grua e fortë. U ka bërë ballë shumë vështirësive në jetë, por kjo është më e forta që ka përjetuar ndonjëherë.

Pavarësisht të gjithave, Sokoli nuk është më në familje e në shoqëri. Ndaj, në këtë 1-vjetor të ndarjes së tij nga jeta, nëna e Sokol Olldashit, Kozeta Mamaqi, ka menduar ta kujtojë atë në një formë krejt të veçantë. Sipas informacioneve që “Dita” disponon, ajo do të organizojë një mbrëmje përkujtimore për djalin e saj.

Për të kujtuar në formën dhe mënyrën si asaj ia do zemra. Mësohet se gjithçka do jetë e përgatitur dhe e kuruar mirë. Do të ketë video dhe foto, do të këtë poezi, aq shumë të dashura për të ndjerin. Nuk do të mungojë kitara, e gjithçka, ç’ka ia mbushte jetën Sokolit.

Ceremonia dhe të (pa)ftuarit

“Me Sokolin” është titulluar ceremonia përkujtimore në nder të ish-ministrit të Transporteve.

Ftesa e shpërndarë në pjesën e parë të saj mban firmën e ish-deputetit demokrat, ndërkohë që në anën tjetër është vendosur fotografia e tij me nënshkrimin: “Takohemi të enjten më 20 nëntor 2014, ora 18:00, në sallën ‘Apollonia’ në Hotel Rogner. Miqtë e Sokol Olldashit”.

Deputetët e njohur si miqtë dhe mbështetësit kryesorë të tij, Astrit Patozi, Igli Cara, po ashtu dhe Mesila Doda, kanë konfirmuar se kanë marrë ftesën për të qenë në ceremoninë në nder të njëvjetorit të ndarjes nga jeta të Sokol Olldashit. Moderatorja e mbrëmjes do të jetë mikesha dhe ish-kolegia e tij, Majlinda Bregu.

Olldashi ka qenë një njeri me shumë dashamirës, si brenda Partisë dhe jashtë saj. Të gjithë miqtë e tij do të jenë të ftuar në atë buzë-mbrëmje.

Ftesat janë bërë gati dhe janë shpërndarë. “Dita” ka siguruar një kopje të saj (në foto). Listës së gjatë të të ftuarve i mungojnë dy persona jo dosido në PD. Bëhet me dije se nuk ka një ftesë për kryetarin e Partisë Demokratike, Lulzim Basha dhe ish-kryeministrin, Sali Berisha.

Mësohet se Basha dhe Berisha nuk janë të preferuarit e familjes Olldashi. Ata nuk duan që këto dy figura të jenë mes tyre. Sigurisht që dyshimet e pas aksidentit kanë qenë prezente, por ajo që ka shtyrë familjarët drejt këtij vendimi ka qenë qëndrimi i këtyre dy figurave pas vdekjes.

Sipas burimeve të “Dita”-s mësohet se familjarët janë hatërmbetur me faktin që në Këshillin Kombëtar të PD nuk u lejua përmendja e emrit të Olldashit dhe as nderimi për të. Se pse është kaq e prekur nëna e Sokolit, ne kemi ndjekur një komunikim të sajin në Facebook, me miqtë e të afërmit. Nuk ka qenë shumë aktive, por për disa ka gjetur kohën të përgjigjet e t’i falënderojë për mbështetjen.

Komenti i saj i fundit i bërë në datën 1 nëntor, është domethënës dhe flet shumë për këtë situatë. Një mikut të saj, që e ngushëllon duke i shkruar Mamaqit në profilin personal, ajo i shkruan: “Faleminderit. Kush e deshi tim bir, është i dashur për mua. Respekte”.

Pse jo Berisha dhe Basha?

Lista e ftesës është përmbyllur dhe ftesat janë në duart e njerëzve që do të jenë të pranishëm. Mungesa e Berishës, nga miqtë e Olldashit shihet edhe si një tregues i pakënaqësisë që nëna e Sokol Olldashit ka për sjelljen e Bashës dhe Berishës pas vdekjes së ish-deputetit. Nuk përjashtohet që këta dy personazhe të rëndësishëm në PD të nisin interlekutorët e tyre për të bindur familjen Olldashi që të dërgojnë një ftesë për sy e faqe. Por e sigurt është që edhe pse mund të sigurojnë një “pjesëmarrje”, nuk do të marrin dot respektin dhe dëshirën e familjarëve për të qenë të pranishëm.

***

KOMENT

TË PAFTUARIT

Ikja nga kjo botë e Sokol Olldashit, për mënyrën e largimit dhe kohën kur ndodhi aksidenti, ngjalli përveç keqardhjes, edhe një kureshtje e vëmendje të shtuar të publikut. Por në rastin e tij, si në jo shumë raste që kanë pasur të bëjnë me impaktin publik të kësaj kategorie njerëzish, elementi shtesë i mungesës vjen nga ndjesia e mosrealizimit, nga pikëpyetjet se çfarë mund të kishte ndodhur apo si do kishin shkuar gjërat, sikur…

Në rastin Olldashi, ky “sikur” vjen e materializohet me hipotezat se si mund të ishte Partia Demokratike sot, nëse do ishte Olldashi në krye të saj; a do kishin pasur një fat të ndryshëm politik kryetari Basha, apo pensionisti i artë Berisha, kreu faktik i partisë, etj. etj. Tani, një vit më pas, pikëpyetjet e kësaj natyre nuk kanë vlerë. Por ama, të paktën vlen të nxjerrim disa konkluzione pikërisht nga ato që kanë ngjarë ndërkohë. Sokol Olldashi gjatë këtyre 12 muajve mungesë është bërë një kontribut inekzistent në PD. Një figurë emri i të cilit nuk përmendet, një njeri që a thua se nuk ka milituar kurrë në ato radhë. Dhe kaq mjafton për të kuptuar një realitet të vjetër të kupolës blu dhe shefit të saj jetëgjatë. Ashtu siç Berishës i ka dalë nami se “mbron të vetët”, se u gjendet pranë besnikëve që e kanë ndihmuar pa kushte dhe nuk janë ndarë kurrë, që nuk i kanë “ra mohit” edhe kur ky u ka ndenjur larg, ftohtë apo është distancuar për shkak të ca rrethanave; po aq kollaj ai i fshin nga memoria ata që guxuan t’i përzihen në planet dhe projektet që ka gatuar. Dhe dalja “kokëshkretë” e Olldashit në garën për kryetarin e ri të PD-së ishte një gjest i tillë, një lëvizje plangprishëse që shefi i madh nuk mund ta përtypte.

Prandaj dhe familja e të ndjerit, siç mësojmë sot, i përgjigjet çiftit 2B në krye të PD-së me të njëjtën monedhë. Duke ftuar vetëm “ata që vërtet e deshën” Kolin; mjaft me hipokrizira e duarshtrëngime false, me lotë krokodili dhe elozhe të gënjeshtërta. Në një moment kaq njerëzor dhe të brendshëm si njëvjetori i kujtimit të tij, shefat le të vazhdojnë të bëjnë atë që janë mësuar të bëjnë.

Siç kemi thënë pak më lart, ndoshta të paftuarit Berisha-Basha bëjnë të pamundurën për të siguruar një ftesë deri në datën 20. Do ishte një përpjekje e ngjashme me tentativën e Berishës për t’i shkuar në shtëpi familjes së Hekuran Dedës. Por ndoshta ata nuk bëjnë asgjë të kësaj natyre, por mjaftohen me vrojtimin se kush do shkojë në përvjetorin e Sokolit nga PD-ja. Për t’i shpallur edhe ata grup armiqësor…