Njëzet e pesë vjet-apo njëzet e dy vjet?!

Që të gjithë e thonë:
“Njëzet e pesë vjet,
vatani ka shkuar,
më për kiamet!”

Që të gjithë e thonë:
“Njëzet e pesë vjet,
këtu nuk ka pasur,
drejtësi dhe shtet!”

Që të gjithë e thonë:
“Njëzet e pesë vjet,
se këtu është bërë,
kërdi e vërtetë!”

Rama i “Rilindjes”,
në çdo muhabet,
e ka të fiksuar:
“Njëzet e pesë vjet!”

Dhe e gjithë “Rilindja”,
kur del edhe flet,
ka në majë të gjuhës:
“Njëzet e pesë vjet!”

Njëzet e pesë vjet,
thotë ka rënë damllaja,
duke futur brenda,
tri vjetët e saja!

I dëgjoj përditë,
edhe bëj çudi,
pse njëzet e pesë,
jo njëzet e dy?!

Me njëzet e pesën,
që u bë gogol,
a po bën “Rilindja”,
një autogol?!

Që këto tri vite,
që janë në drejtim,
tok me gjithë të tjerët,
quhen një dështim!

Njëzet e pesë vjet,
thonë të gjithë të bindur,
duke vërtetuar,
se s’kemi rilindur!

Po të kishte bërë,
këtu prokopi,
“Rilindja” do thoshte:
“Njëzet edhe dy!”

Nëse do qe bërë,
sado pak progres,
s’kishte pse të thoshte:
“Njëzet edhe pesë!”

Njëzet e pesë vjet,
që vazhdon murtaja,
duke llogaritur,
dhe tri vjet të saja?!

Këtu propaganda,
flet për mrekulli,
po askush nuk thotë:
“Njëzet edhe dy!”

Askush s’llogarit,
tri vite të ndritur,
sepse tek dështimi,
janë llogaritur!

Tri vitet e Ramës,
në kuptim të fjalës,
janë bashkangjitur,
me vitet e Salës!

Me vitet kur “Nobel”,
mori dekadenca,
tek njëzet e pesa,
s’bëhet diferenca!

Thjeshtë kemi të bëjmë,
me vazhdimësi,
se ndryshe do thoshin:
“Njëzet edhe dy!”

Po kur deklarojmë,
plot njëzet e pes’,
Rama me Berishën,
janë në një thes!

Dështimi pranohet,
nga kjo qeveri,
se ndryshe do thoshin:
“Njëzet edhe dy!”

Njëzet e pesë vjet,
kënetë edhe gjol,
s’e di pse “Rilindja”,
bën autogol!

Kush është pak i mençur,
e kupton kuptimin,
se këto dy shifra,
do bënin ndryshimin!