Pyet Noka: Ku gjendet laboratori i përpunimit të drogës, të kapur në Maminas?

Nënkryetari i Komisionit të Sigurisë, Flamur Noka, në një deklaratë në selinë e PD për kokainën e kapur në Maminas, i ka kerkuar kryeministrit Rama të tregojë se ku gjendet laboratori ku do të përpunohej kokaina e ardhur nga Kolumbia, si dhe drejton pyetjen se kush fshihet pas tij.

“Sasia më e madhe e drogës së fortë të kapur ndonjëherë në Shqipëri ka përfunduar jetime deri tani, e duket se do qëndrojë jetime. Kjo tregon se ka ardhur në Shqipëri me nje mburojë të fortë politike.

Pronarët e vërtetë s’kapen se për ta kujdeset vetë qeveria. Qeveria nuk e kap dot kupolën, familjen kryeministrore, vëllanë e Ramës.

Çfarë frike kishte Edi Rama që bëri çdo përpjekje për ta quajtur të suksesshëm një operacion të tradhëtuar? Pse gënjeu dhe kush e shtrëngoi të bënte gjithçka për të fshehur faktin që droga ishte e sinjalizuar nga DEA dhe marinat kolumbiane, si dhe u ndoq deri në destinacion nga ata?

Rama lan duart thjesht me shkarkimin e një drejtori në portin e Durrësit 5 ditë pas mbërritjes së kokainës.

Kokaina ishte e pastër, pra 300 mijë euro një kg. Ku është laboratori ku kjo drogë do përzihej, dhe kush fshihet pas këtij laboratori?”, tha Noka në deklaratën e tij.

s.a/dita