Dërguar me Email
në adresën e redaksisë
Berisha me politikën primitive dhe arrogante nuk lejoi asnjëherë njerëz me integritet dhe autoritet pranë vetes, sepse në atë politikë mbijetuan njerëz pa shtyllë kurrizore, poltron e servilë të cilët bëjnë papagallin e Berishës, si Basha, Bumçi, Paloka, Halimi, Topalli, Vokshi, Ristani, Duma, Strazimiri, Nokaj, etj., madje për të mbijetuar politikisht, edhe personalitete që në fillim dëshmuan një integritet, u detyruan të nënshtrohen dhe të shndërrohen në papagaj të shefit. Luli është ndër më të paaftit, ai në fakt nuk ka vizion as potenciale për lider, sepse nuk ka as aftësi as prirje për iniciativë, kështu që mund të funksionojë vetëm si instrument në dorën e Berishës. Ai për katër vite pothuajse nuk bëri asgjë që do mbetej në kujtesën e qytetarëve të Tiranës. Po të qëndronte edhe tri mandate të tjera, ai nuk do bënte asgjë përveçse kësi vizatimesh e broçkullash. Tirana në vend të ecjes përpara degradoi këto katër vite me Lulin kryebashkiak. Merre me mend si do degradonte Shqipëria po të ndodhte (mos e dhëntë Zoti) që të qeverisej nga Lul Basha. Është evidente se me Lulin e Berishën në krye të opozitës koalicioni i majtë në fakt nuk ka fare opozitë faktike dhe konkurrencë politike as operacionale. PD-ja sot nuk ofron asgjë pos akuzave, zhurmës, intrigave dhe arrogancës e konfrontimit. Luli me Berishën kërcejnë nga një degë në tjetrën me shpresë se do rrëzojnë qeverinë me intriga e gënjeshtra, por ajo kohë kaloi dhe ai model i politikës është i papranueshëm për shqiptarët. Luli nuk mund të qëndrojë as një javë në krye të PD-së pa Berishën.