Denoncimi: Vjehrri më ngacmonte në sy të fëmijëve

Një 37-vjeçare në Devoll ka denoncuar vjehrrin e saj për ngacmim seksual. Lajmi është bërë me dije nga policia e qytetit të Korçës ndërsa bëhet me dije se i moshuari Karafil Topi 72-vjeç është vënë në pranga menjëherë, pasi është kallëzuar nga nusja e djalit të tij se e ka dhunuar seksualisht. Sipas dëshmisë që nusja ka bërë në polici, vjehrri ka abuzuar me të nga prilli deri në korrik të këtij viti. Policia pas arrestimit të të moshuarit ka nisur hetimet për zbardhjen e plotë të ngjarjes. Fatime Topi nga fshati Bitinckë ka rrëfyer për policinë gjithçka ajo pretendon se ka përjetuar në shtëpinë e saj, në kohën kur bashkëshorti i saj nuk ishte në shtëpi. Gruaja, e cila është nënë e 5 fëmijëve iu ka thënë bluve se vjehrri i saj 72-vjeçar e ngacmonte seksualisht prej disa muajsh, ngacmime që shpesh kryheshin edhe në sytë e fëmijëve të saj. Gruaja ka denoncuar rastin në polici, ndërsa gjatë rrëfimit ka deklaruar se për shkaqe ekonomike çifti detyrohej të flinte në të njëjtën dhomë me të moshuarin dhe fëmijët.  Ajo pretendon se vjehrri e ngacmonte, kur bashkëshorti nuk ndodhej në shtëpi, ndër kohë që rasti më i fundit ka qenë dy ditë më parë ndërsa burri i saj e kishte parë 72-vjeçarin ndërsa tentonte të prekte 37-vjeçaren. Gruaja apelon për dënimin e vjehrrit të saj dhe paralajmëron se do të largohet nga shtëpia, nëse ai kthehet sërish aty. Policia ka vënë në pranga të moshuarin i cili do të hetohet dhe gjykohet për ngacmim seksual, ndërsa mësohet se materialet i kanë kaluar prokurorisë për hetime të mëtejshme.