O Halim më paç uratë, kot që dole në fushatë!

Arben Duka

Ta thashë dhe më parë,
ta shkrova-o lumë,
po mos dilje fare,
do merrje më shumë!

Shumë do të thoshin,
se je burrë i mirë,
dhe do të votonin,
për ty me dëshirë!

Po ja që ti dole,
shpalose nivelin,
edhe vetes tënde,
ja kërreve themelin!

Po për dreq ti dole,
dhe nxore “revolen”,
thamë që le në hije,
dhe Koço Devolen!

Na bëre me gaz,
mor t’u shtoftë jeta,
gjithë ato qyfyre,
edhe barsoleta!

Na bëre me gaz,
mor të marrtë e mira,
në shalët e grave,
ke parë çudira!

Na thuaj ç’ke parë,
mor t’u shtoftë jeta,
s’besoj të kesh pritur,
bomba dhe raketa!

Sepse kjo do qe,
çudi e vërtetë,
dhe aspak fëmijët,
që vijnë në jetë!

Ata do të lindnin,
me ty a pa ty,
në jetë i sjell nëna,
s’mund t’i sjellësh ti!

Dhe unë s’po ta them,
si për punë inati,
këtë punë e bëjnë,
qindra mami fshati!

S’mund të fluturosh,
në hava si zog,
për faktin që je,
një gjinekolog!

Një gjinekolog,
që ke patur fat,
kjo s’është një dhunti,
por thjeshtë një zanat!

Në atë zanat,
je vërtetë i shquar,
po kjo-jo shumë njerëz,
nxit për të votuar!

Ndaj më mirë mos dilje,
para mikrofonit,
se dhe mund të vilje,
ca nga të Erionit!

Po tani kjo gjë,
është krejt e pamundur,
se duket ke dalë,
vetëm për të humbur!

Të mos dilje fare,
do ishe më mbarë,
se tani Erioni,
s’ka më kundërshtarë!

S’e kisha menduar,
kurrë-që kjo fushatë,
na kish rezervuar,
gjithë këtë gallatë!

Ky hall të qëlloi,
në prag të pensionit,
rrugën me dafina,
ja shtrove Erionit!

S’janë thashetheme,
as fjalë në erë,
“kultura supreme”,
do mbetej mister!

Nuk do t’i dëgjonim,
këta xhevairë,
dhe do të votonim,
thjeshtë nga nami i mirë!

Dhe dy ditë që mbeten,
s’rikthejnë asnjë vlerë,
se ti-Halim veten,
e hodhe në erë!

Punën vetë e prishe,
ndaj unë s’them më kot,
dhe majtas të ishe,
nuk fitoje dot!