Presidenti amerikan Barack Obama, ka firmosur një urdhër të fshehtë që autorizon një mision më të madh ushtarak në Afganistan gjatë 2015-ës, sipas të përditshmes amerikane “The New York Times”. Ky vendim u lejon trupave amerikane të ushtrojnë një rol direkt në Afganistan, për të paktën edhe një vit.
Vendimi i Obamas mendohet se është bërë gjatë një takimi me këshilltarët e Sigurisë Nacionale në Shtëpinë e Bardhë. Në muajin maj Obama pohoi se Ushtria Amerikane nuk do të kishte një rol luftarak në Afganistan gjatë 2015-ës, prandaj misionet e 9800 efektivëve të dislokuar do të limitoheshin për të stërvitur forcat afgane dhe të ndalonin “mbetjet” e Al Kaedas.
Ky urdhër i ri i firmosur nga Presidenti u lejon trupave amerikane të vënë në zbatim misione kundër talibanëve dhe milicëve të tjerë që përbëjnë një kërcënim për sigurinë e ushtrisë, apo të qeverisë afgane. Gjithashtu ky autorizim i hap dritën jeshile sulmeve ajrore për të mbështetur luftën e forcave afgane, që në disa raste shoqërojnë efektivët e tyre në operacionet kundër talibanëve.
Vendimi për të ndryshuar misionin ka qenë rezultat i një debati të gjatë që ka vënë në dukje tensionin që ekziston në gjirin e Administratës Obama dhe përfshin: Premtimi i Presidentit për t’i dhënë fund luftës në Afganistan dhe kërkesat e Pentagonit që trupat amerikane të mund të përfundojnë me sukses misionet ushtarake që janë parashikuar në vend.
Roli ushtarak i SHBA-së në Afganistan në vitin 2015 ka qenë një çështje ekstremisht e diskutueshme për shumë kohë. Zyrtarët amerikanë pranojnë që edhe pse debati për natyrën e rolit ushtarak të SHBA-së është i hapur prej kohësh, dy çështje të fundit kanë prekur në mënyrë sinjifikative rezultatet e tyre.
Një prej tyre është, kritikat me të cilat po përballet Obama pas avancimit të forcave të Shtetit Islamik në Irak dhe në Siri dhe çështja e dytë është ardhja në pushtet e Presidentit Ashraf Ghani në Afganistán, që është shfaqur shumë më i hapur ndaj zgjerimit të misionit ushtarak të SHBA-së në vend se sa paraardhësi i tij, Hamid Karzai.