“Kërcënimin” e presidentit Hashim Thaçi se skena politike do të mbetet pa të, nëse nuk ndryshohet ligji për mënyrën se si zgjidhet presidenti, është vlerësuar si lajm i mirë nga deputetët e Kuvendit të Kosovës.
Madje nuk kanë hezituar ta cilësojnë si figurën më të keqe publike Hashim Thaçin të cilit ia atribuojnë imazhin e keq të vendit, raporton KTV.
Vjosa Osmani që është deputete e LDK-së ka thënë se pikërisht ky veprim i Thaçit i duhet Kosovës, ndërsa e cilëson absurde kërkesën që Kuvendi të ndryshojë procedurat e zgjedhjes së presidentit.
Ndërkohë, deputetja e Vetëvendosjes, Albulena Haxhiu, ka kundërshtuar të dyja idetë edhe që zgjedhja të bëhet me shumicë të thjeshtë, edhe që të bëhet direkt nga populli.
Edhe deputeti i Alternativës, Ilir Deda, e ka mirëpritur këtë deklaratë të presidentit. Ai thotë se më e mira është që të mos jetë më në krye të shtetit. Madje sipas tij, ai as që do të duhej të zgjidhej.
Sikurse në konferencën e fundit me gazetarë, ashtu edhe në fjalimin vjetor para deputetëve, presidenti Hashim Thaçi ka treguar se nuk ka hequr dorë nga reforma zgjedhore, madje ka deklaruar se ajo do të përmbyllet në 60 ditët e para të 2018-s.