Ka nisur këtë të martë në Gjykatën e Tiranës seanca përgatitore gjyqësore mes vajzës së kryeministrit Argita Berisha dhe deputetit të Partisë Socialiste, Taulant Balla. Argita depozitoi në 11 janar të këtij viti padi ndaj deputetit socialist, lidhur me një serë akuzash që ai ka lëshuar në drejtim të saj për përfitime duke shfrytëzuar postin e të atit.
Në seancën përgatitore deputeti socialist Balla i kërkoi gjykatës që të paraqitej si dëshmitar biznesmeni pakistanez Zafar Ansar, i cili pretendon se kompania ligjore e vajzës së kryeministrit i ka kërkuar deri në 3% të vlerës së investimit për një projekt në fushën energjetike që ai kishte në plan të investonte në Shqipëri.
“Argita Berisha nuk vjen as në gjykatë, për të sqaruar mënyrën e pasurimit të saj, ndërkohë që kishte deklaruar se do të ishte e gatshme për tu ballafaquar në gjykatë. Në seancën tjetër do t’i sjellim gjykatës edhe provat që ne disponojmë për mënyrën e pasurimit të Argitës. Sigurisht më lejoni të informoj se i kemi kërkuar gjykatës të thirret si dëshmitar edhe biznesmeni Zafar Ansar, të cilit Argita Berisha i kërkoi 3% të 100 milionë eurove investim. Pra i kërkoi 3 milionë euro për firmën e babit kryeministër.”- deklaroi Balla.
Deputeti socialist u shpreh më tej se nuk priste drejtësi nga gjykata, për sa kohë kjo gjykatë liroi të akuzuarit e 21 janarit. Seanca e radhës ku pritet të nisë shqyrtimi në themel i çështjes, pritet të zhvillohet më 12 mars./bw