Pagat e 2009-s, 15 deputetë të mazhorancës vijojnë betejën ligjore

Edhe pse kanë kaluar rreth pesë vjet, deputetët e Partisë Socialiste vijojnë betejën e tyre për të marrë përfitimet si deputet për periudhën shtator 2009-maj2010. Janë rreth 15 deputetë të mazhorancës të cilët kanë depozituar në Gjykatën Administrative të Apelit, kërkesë-padi në lidhje me disa përfitime financiare të pashlyera nga ana e Kuvendit.

Deputetët e PS bojkotuan Kuvendin që në seancën e parë shtator 2009. Në paditë e tyre deputetët pretendojnë se për disa muaj në harkun kohor shtator 2009-maj 2010, nuk kanë marrë përfitimet financiare, paga, dieta për udhëtime apo telefon, që u takojnë me ligj për shkak të “statusit të deputetit”.

Objekti i padive është “detyrimi i Kuvendit të Shqipërisë që të paguajë të gjitha përfitimet financiare që burojnë nga legjislacioni për ‘statusin e deputetit’ dhe që lidhen me ushtrimin e funksionit.

Pagat

Nëse Gjykata Administrative Apelit do të shprehet pozitivisht në favor të deputetëve, shpërblimi do të bazohet në vendimin e vjetër të Kuvendit, kohë që përputhet dhe me kërkesën e tyre.

Sipas vendimit të asaj kohe, të gjithë deputetët merrnin një pagë standarde prej 155 550 lekë në muaj (bruto), e cila pasi zhvishej nga detyrimet, siç janë Sigurimet Shoqërore, Sigurimet Suplementare dhe Tatimi mbi Të Ardhurat Personale, zbriste në 123 951 lekë në muaj.

Kjo ishte paga neto që kalonte në llogaritë e deputetëve. Në total, paga vjetore që përfitonte një deputet i Kuvendit të Shqipërisë, ishte 1 866 600 lekë.

Ndryshe nga deputetët, Kryetari Kuvendit, nënkryetarët dhe kryetarët e Grupeve Parlamentare kishin pagë të niveleve të ndryshme. Tre nënkryetarët kishin paga në nivelin e 186 150 lekëve në muaj. Kryetarët e Grupeve Parlamentare merrnin një pagë mujore prej 178 883 lekë.

Deputetët përfitonin dieta për shërbime të ndryshme. Ata që nuk jetonin në Tiranë për shembull përfitonin dieta për pjesëmarrje në Punimet e Seancave Plenare, Mbledhjet e Grupit Parlamentar, Komisionet Parlamentare, etj.

Shuma e dietave mujore varionin nga 37 332 lekë deri në 74 664 në muaj. Të gjithë deputetët përfitonin çdo muaj një kuotë të caktuar për shpenzimet e telefonit. Kuota ka qenë fikse, 17 000 lekë në muaj për secilin prej tyre, por ndryshonte për kryetarët e grupeve parlamentare dhe kryetarët e komisioneve. Këta të fundit merrnin një trajtim prej 20 mijë lekë në muaj për shpenzime telefoni.

Në atë kohë, deputetët kishin edhe të drejtën për makina, e cila më pas u zëvendësua me një pagesë për shpenzimet e karburantit gjatë kryerjes së detyrave të tyre, siç është shkuarja në zonat elektorale, transporti vetjak, etj.

Masa e shpenzimeve për karburantin u vendos mbi parimin: paguhet më shumë ai që ka zonën elektorale më të largët.