Paketat e shërbimeve mjekësore që do ofrohen falas në shtet e privat

Pranvera Kola 

Duke zbatuar sistemin e referimit, edhe për këtë vit, pacientët shqiptarë do të vijojnë të përfitojnë nga paketat shëndetësore të nefrologjisë dhe kardiokirurgjisë, implantit koklear, etj, pa pagesë, si në strukturat spitalore publike, ashtu edhe në ato jopublike të kontraktuara nga Fondi i Sigurimit të Detyrueshëm të Kujdesit Shëndetësor (FSDKSH). Në vendimin e zbardhur gjatë ditës së djeshme në Fletoren Zyrtare të Qeverisë janë ndryshimet e bëra në ofrimin e paketave përkatëse, ku janë përcaktuar edhe kostot konkrete të financimit të këtij shërbimi në institucionet publike dhe jopublike. Ndërkohë që pacientët në çdo rast do të përfitojnë rimbursimin e shërbimit në masën 100 për qind.

Shërbimet që përfitohen

Konkretisht, nga këto paketa mund të përfitohen rreth 10 shërbime spitalore që janë: Dializa, Transplanti i veshkave, Terapia e flakjes acute, Pacemaker definitive, Angiografi koronare, Angioplastikë koronare, Interventet valvolare, Interventet kongenitale, By pass koronar, Implanti koklear për personat me probleme dëgjim, etj. Këto paketa që financohen 100 për qind nga Fondi i Sigurimit të Detyrueshëm të Kujdesit zbatohen në bazë të protokolleve të miratuara nga Ministria e Shëndetësisë. Fondi administron Regjistrin Kombëtar të Paketave të shërbimeve shëndetësore, duke përcaktuar edhe rregullat, kriteret dhe mënyra e organizimit të këtyre harbimeve si në spitalet publike ashtu edhe në ato private.

Si duhet të veproni për të përfituar!

Ekspertët e Fondit sqarojnë se rruga që duhet të ndjekë pacienti nis nga zbatimi i sistemit të referimit, për të patur konsultën e shërbimit përkatës (të nefrologjisë, kardiologjisë, kardiokirurgjisë ose ORL-së). Vendimin, nëse pacienti ka nevojë për një paketë shërbimi, e merr pikërisht shërbimi përkatës në Qendrën Spitalore Universitare “Nënë Tereza”. Më pas pacienti drejtohet në zyrat e Fondit ku bën regjistrimin. Pacienti fillimisht regjistrohet në institucionet shëndetësore publike në përputhje me kapacitetet e lira të raportuara pranë zyrës së Fondit, dhe në rast se në datën e përcaktuar, nuk ka vende të lira në institucionin shëndetësor publik, atëherë nëpunësi i autorizuar i sektorit bën regjistrimin e pacientit në mënyrë të barabartë në institucionet shëndetësore private të kontraktuara nga Fondi. Pacientit i merren të dhënat anagrafike dhe adresa, për t’u kontaktuar më pas nga Fondi në momentin e krijimit të mundësisë për marrjen e shërbimit. Financimi është në masë të njëjtë, pra 100%, si në institucionet shëndetësore publike, ashtu dhe në ato jopublike, çka do të thotë se  pacienti nuk paguan asgjë shtesë, pavarësisht faktit se ku e merr shërbimin. Edhe spitali jopublik, që ka kontratë me FSDKSH-në, është i detyruar të trajtojë pacientët e referuar nga Regjistri Kombëtar i Paketave të shërbimeve dhe nuk aplikon pagesë ndaj pacientëve të referuar nga Fondi. Fondi i Sigurimit të Detyrueshëm të Kujdesit Shëndetësor financon paketat e mësipërme në institucione shëndetësore publike, në përputhje me kapacitetet e tyre për ofrimin e shërbimeve të paketave. Për rastet që janë përtej kapaciteteve mjekësore të institucioneve shëndetësore publike, Fondi lidh kontrata dhe financon shërbimet e paketave në institucione shëndetësore private. Fondi ngre strukturat për auditimin dhe monitorimin e ofrimit të paketave të shërbimeve nga institucionet shëndetësore publike dhe private të kontraktuara.

Paketa e Shërbimit të Dializës

Paketa e shërbimeve të kardiologjisë

Paketa e shërbimeve të kardiokirurgjisë

Paketa e shërbimit të transplantim të veshkës dhe flakjes akute

Paketa e implantit koklear

Paketa e shërbimeve të radioterapisë