Zbatimi i sistemit të referimit duhet të jetë pikënisja e çdo pacienti që kërkon të kryejë falas ndërhyrje të kardiologjisë dhe kardiokirurgjisë në spitalet publike dhe jopublike, të marrë shërbimin e dializës, si dhe kryerjen e transplantit të veshkës në rastet e nevojshme.
Pacientët që janë në gjendje më të rëndë shëndetësore do të jenë të parët në listat e përfitimit të këtyre shërbimeve, financimi i të cilave mbulohet tërësisht nga Fondi i Detyrueshëm i Sigurimeve dhe Kujdesit Shëndetësor (FSDKSH). Ekspertët e këtij institucioni sqarojnë se për të marrë këto shërbime çdo pacient duhet të faktojë me anë të vizitave të kryera sipas sistemit të referimit ecurinë e tij shëndetësore.
Për të përfituar paketat shëndetësore që financohen nga fondi, pacienti duhet të ndjekë katër hallkat, që nga mjeku i familjes tek mjeku specialist, më pas në shërbimin e konsultës së spitalit terciar, dhe në fund në zyrat e fondit për të mësuar ditën se kur do të kryejë ndërhyrjen. Konkretisht, sipas procedurës së përcaktuar pacienti fillimisht duhet të paraqitet pranë mjekut të familjes në shërbimin mjekësor parësor. Pasi kryen vizitën përkatëse mjeku e referon pacientin tek shërbimi dytësor i mjekut specialist, ku vijon kryerjen e ekzaminimeve të tjera të nevojshme.
Mjeku specialist zbaton sistemin e referimit dhe pasi i jep shërbimin përkatës pacientit e referon atë në sistemin terciar (spitali universitar), për të kryer konsultën finale të patologjisë së tij. Do të jetë konsulta e shërbimit spitalor terciar që do të përcaktojë nëse pacienti ka nevojë për trajtimin përkatës të dializës, transplantit, paketave të kardiologjisë apo kardiokirurgjisë.
Më pas me konsultën, kartën e shëndetit dhe mjetin e identifikimit, pacienti paraqitet në zyrën e FSDKSH-së që ndodhet pranë shërbimit spitalor terciar, e cila i planifikon ndërhyrjen në spitalin publik dhe në rast të tejkalimit të kapaciteteve dhe pamundësisë për të dhënë shërbimin përkatës në shtet, kjo zyrë e dërgon pacientin në spitalet private për të kryer ndërhyrjen ose ekzaminimet e tjera të nevojshme.
Shërbimet dhe kujdesi që i ofrohen pacientit si në spitalin publik ashtu dhe në atë privat rimbursohen në masën 100 për qind nga Fondi i Sigurimeve dhe Kujdesit Shëndetësor sipas përcaktimeve të bëra për secilën nga paketat. Bashkangjitur shkrimit gjendet e plotë kostoja që Fondi paguan për çdo shërbim që pacienti merr si në spitalet publike apo private, pasi të ketë ndjekur procedurën e përshkruar më lart. Rreth 900 është numri i pacientëve që trajtohen aktualisht me shërbimin e dializës.
Specialistët e fondit sqarojnë se ofrimi i këtij shërbimi rimbursohet me fondet e FSDKSH-së, ndërkohë që pacientët e marrin kujdesin në 4 spitale publike dhe 3 spitale private. Dërgimi i pacientëve për të marrë këtë shërbim edhe në strukturat private ka ulur mbingarkesën në QSUT, duke i lejuar ata të marrin një shërbim më të plotë dhe më cilësor.
“Në katër muajt që kemi lënë pas rreth 400 është numri i pacientëve që kanë përfituar ndërhyrje të kardiologjisë dhe kardiokirurgjisë në spitalet publike dhe jopublike. Rreth 900 pacientë të tjerë po marrin shërbimin e dializës në katër spitalet publike dhe tre private. Po gjatë kësaj kohe pacientë i janë nënshtruar transplanteve, kryerja e të cilave është zhvilluar në spitalet private për shkak të infrastrukturës së duhur mjekësore. Ndërkohë që financimi i tyre edhe në privat është mbuluar nga FSDKSH.
Nga këto raste që kanë nevojë për transplant dhe kanë dhurues familjarë të përshtatshëm, përfituan pacientët që ishin prej vitesh në listë-pritje”, sqarojnë ekspertët e Fondit. Sipas tyre, FSDKSH i financon 100 për qind paketat shëndetësore, ndërsa spitali publik ose jopublik është i detyruar të trajtojë pacientët e referuar nga Regjistri Kombëtar i Paketave të Shërbimeve dhe në asnjë rast nuk aplikon pagesë ndaj pacientëve të referuar nga Fondi.