Paloka: Karta jonë fituese, premtimet e mbajtura

Deputeti demokrat, Edi Paloka, akuzon kryesocialistin Rama se e ka kthyer në tender përzgjedhjen e kandidatëve për deputetë. Paloka u shpreh se karta më e fortë e PD-së në zgjedhjet e qershorit janë premtimet e mbajtura dhe besimi i qytetarëve.

“Ne kemi deputetët në Parlament, të cilët kanë detyrimet e tyre ndaj qytetarëve deri në ditën e fundit të mandatit. Pavarësisht se si do të ndryshojnë listat, a do të jenë apo jo këta deputetë në listat e reja, ne vazhdojmë të jemi në detyrën tonë deri ditën e fundit. Në përzgjedhjen që do të bëhet do të ketë ndryshime qoftë në emra qoftë në lëvizje qarqesh. Tek ne zgjedhja e deputetëve nuk është një dramë , si është tek Partia Socialiste. Tek PS-ja zgjedhja e deputetëve është kthyer në tender. Rama zgjedh për deputetë  biznesmenë, të cilët nuk i njeh më as qyteti i tyre”, tha Paloka në një intervistë për Ora News. “Karta më e fortë e Partisë Demokratike është dhe slogani ynë. Ne jemi në rrugë të mirë dhe kemi treguar se çfarë premtojmë ne e realizojmë. Njerëzit e ndiejnë që ndryshimi që ata kërkojnë është tek PD-ja dhe jo tek Rama dhe tek PS-ja. Vullneti ynë është i qartë, të realizojmë ato që premtojmë.  Besimi i qytetarëve tek ne është arma më e fortë që ne do të kemi”, tha Paloka.